«ԱՄԵՐԻԱ» ԸՆԿԵՐՈՒԹՅՈՒՆԸ ԻՐԱԿԱՆԱՑՆՈՒՄ Է ՀԱՅԱՍՏԱՆՈՒՄ ԱՌԱՋԻՆ
ՄԻՋԱԶԳԱՅԻՆ ՄԱՆԿԱԿԱՆ ՃԱՄԲԱՐԻ ԳՈՐԾԱՐԿՄԱՆ ԾՐԱԳԻՐ
08-05-2007 22:00:00 | Հայաստան | Հասարակություն
ԵՐԵՎԱՆ, 8 ՄԱՅԻՍԻ, ՆՈՅՅԱՆ ՏԱՊԱՆ: Մի շարք սփյուռքահայ
ներդրողների պատվերով «Ամերիա» խորհրդատվական ընկերությունը
ձեռնարկել է Հայաստանում առաջին միջազգային ամառային մանկական
ճամբարի հիմնադրման ծրագիր, որի նպատակն է իրականացնել տեղացի եւ
սփյուռքահայ մանուկների հանգիստն ու ուսուցումը: Արդեն ավարտվել է
Դիլիջան քաղաքում կառուցվելիք ճամբարի նախագծման եւ գործարկման
ծրագրի առաջին փուլը:
Ամփոփվել է մարտին ճամբարի ճարտարապետական նախագծման համար
հայտարարված մրցույթի արդյունքները, որին մասնակցել են ավելի քան
20 ճարտարապետական ընկերություններ ինչպես Հայաստանից, այնպես էլ
արտերկրից: «Ամերիան» ընտրել է երեք լավագույն նախագիծ, որոնք
ներկայացվել են «Հայնախագիծ» ԲԲԸ 4-րդ արվեստանոցի, «Ստորակետ»
ճարտարապետական արվեստանոցի եւ ճարտարապետ Վ.Հարությունյանի
կողմից: Ինչպես հայտնեցին «Ամերիա» ընկերությունից, այս երեք
նախագծերի հեղինակները կստանան պարգեւատրում` 300 հազարական դրամ:
Հունիսին կիրականցվի ճամբարի նախագծի վերջնական ընտրությունը`
հաշվի առնելով եզրափակիչ փուլ անցած երեք նախագծերի տեխնիկական
առաջարկների լրացուցիչ քննարկման արդյունքները:
Ծրագրի իրագործմանն ուղղված ներդրումները կազմում են մոտ 5
մլն ԱՄՆ դոլար: Միջազգային բոլոր չափանիշներին համապատասխանող
ճամբարի ղեկավարումը ստանձնել է «Village Camps» շվեյցարական
ընկերությունը` տվյալ ոլորտում մասնագիտացած ամենահանրահայտ եւ
խոշորագույն միջազգային ընկերություններից մեկը: