ԴԱՏԱԽԱԶՈՒԹՅԱՆ ՄԱՍԻՆ ՆՈՐ ՕՐԵՆՔՈՎ ԱՅՆ ԿԶՐԿՎԻ ՔՆՆՈՒԹՅՈՒՆ
ԿԱՏԱՐԵԼՈՒ ԳՈՐԾԱՌՈՒՅԹԻՑ ԵՎ ԿԴԱԴԱՐԻ ԼԻՆԵԼ ԿԵՆՏՐՈՆԱՑՎԱԾ ՀԱՄԱԿԱՐԳ
03-05-2007 19:30:00 | Հայաստան | Հասարակություն
ԵՐԵՎԱՆ, 3 ՄԱՅԻՍԻ, ՆՈՅՅԱՆ ՏԱՊԱՆ: «Դատախազության մասին» ՀՀ
օրենքով կատարված փոփոխությունները կարող են էապես նվազեցնել
կոռուպցիոն ռիսկերը հենց դատախազության համակարգում: Այս մասին
«Ֆեմիդա» հասարակական կազմակերպության կողմից հրավիրված մայիսի 2-ի
քննարկմանը նշեց ՀՀ գլխավոր դատախազի տեղակալ Գեւորգ Դանիելյանը:
Դատախազության մասին նոր օրենքը ուժի մեջ է մտել մայիսի 1-ից,
սակայն այն լիովին գործադրելու համար անհրաժեշտ է ընդունել շուրջ
50 իրավական նորմատիվ ակտեր, այդ թվում, փոփոխություններ Քրեական
դատավարության օրենսգրքում:
Օրենքի մի մասը ուժի մեջ է մտնելու հունիսի 1-ից, մյուս մասը
դեկտեմբերի 1-ից եւ օրենքն ամբողջությամբ` 2008թ-ի հունվարի 1-ից:
Նոր օրենքով նախատեսված հիմնական փոփոխությունը այն է,
որ քննչական ապարատը դուրս է գալու դատախազության
համակարգից:
2007թ-ի դեկտեմբերի 1-ից դատախազությունը այլեւս քննություն
չի իրականացնելու: Քննչական գործառույթից հրաժարումը, ըստ Գ.
Դանիելյանի, նպատակ ունի ավելի ուժեղացնել հետաքննության եւ
նախաքննության նկատմամբ հսկողությունը:
«Դատախազության մասին» նոր օրենքով հստակորեն ամրագրվել է, որ
քրեական հետապնդումը դատախազի բացառիկ իրավունքն է, այսինքն
մեղադրանքը առաջադրում է միայն դատախազը: Նույն դատախազը նաեւ
հսկողություն է իրականացնում հետաքննության եւ նախաքննության
նկատմամբ, ապա մեղադրանքը պաշտպանում դատարանում: Այս նոր
սկզբունքը արդեն իսկ սկսել է փորձնական կարգով կիրառվել Հայաստանի
տարբեր համայնքներում, իսկ 2007թ-ի հունվարի 1-ից «միեւնույն
դատախազի» սկզբունքը գործում է հանրապետության դատախազության բոլոր
մարմիններում:
Օրենքով փոփոխություն է նախատեսվում նաեւ դատախազության կողմից
իրականացվող պետական շահերի պաշտպանության գործընթացում: Այսուհետ
միջազգային արբիտրաժներում գույքային վեճերով Հայաստանի
Հանրապետությունը կներկայացվի դատախազության կողմից:
Օրենքով դատախազությունը դադարում է կենտրոնացված համակարգ
լինել. այսուհետ վերադաս դատախազը կարող է ցուցումներ տալ միայն իր
անմիջական ենթակայության տակ գտնվող դատախազին, վերջինս դրանք
կարող է չկատարել, եթե դրանք անօրինական կամ անհիմն են: Ընդ որում,
դատախազը կարող է բողոքարկել վերադասի անհիմն ցուցումները, իսկ
անօրինական ցուցումները բողոքարկել պարտավոր է:
Օրենքով էական փոփոխություններ են կատարվել համակարգում
կադրային նշանակումների հարցում. ՀՀ գլխավոր դատախազին ՀՀ Նախագահի
ներկայացմամբ ընտրում է ԱԺ-ն, իսկ գլխավոր դատախազի տեղակալներին`
ՀՀ գլխավոր դատախազի ներկայացրած թեկնածություններից նշանակում է
ՀՀ Նախագահը: Դատախազներին զբաղեցրած պաշտոնից հեռացնելու
լիազորություն այլեւս ՀՀ գլխավոր դատախազին վերապահված չէ:
Դատախազները կարող են զբաղեցրած պաշտոնից հեռացվել եւ իսկ նոր
թեկնածուները` նշանակվել միայն Դատախազության համակարգում գործող
էթիկական եւ որակավորման հանձնաժողովների եզրակացության հիման վրա: