ՀԱՅԱՍՏԱՆԻ ՊԵՏԱԿԱՆ ԿԱՄԵՐԱՅԻՆ ՆՎԱԳԱԽՈՒՄԲԸ ԻՐ ՎԵՐԱԿԱԶՄԱՎՈՐՄԱՆ
10-ԱՄՅԱԿԸ ԿՆՇԻ ՀՈԲԵԼՅԱՆԱԿԱՆ ՀԱՄԵՐԳՈՎ
03-04-2007 19:55:00 | Հայաստան | Մշակույթ
ԵՐԵՎԱՆ, 3 ԱՊՐԻԼԻ, ՆՈՅՅԱՆ ՏԱՊԱՆ: Հայաստանի Պետական կամերային
նվագախումբը (ՀՊԿՆ) ապրիլի 5-ին Ռուս-հայկական (Սլավոնական)
համալսարանի համերգասրահում հանդես կգա իր վերակազմավորման
10-ամյակին նվիրված հոբելյանական համերգով: Նվագախմբի հրավերով
համերգին կմասնակցեն իտալացի սաքսոֆոնահար Ֆեդերիկո Մոնդելչին,
ամերիկահայ պարուհի Աիդա Ամիրխանյանը: Ինչպես ապրիլի 3-ի
ասուլիսում հայտնեց նվագախմբի գեղարվեստական ղեկավար եւ գլխավոր
դիրիժոր Արամ Ղարաբեկյանը, համերգից հետո համալսարանի ճեմասրահում
կբացվի լուսնկարների ցուցահանդես, ինչպես նաեւ կցուցադրվի
2006թ.-ին Զվարթնոց տաճարում կայացած բացօթյա համերգի
տեսաժապավենը: Ապրիլի 8-ին Հանրային հեռուստատեսությամբ կկայանա
այդ ֆիլմի պրեմիերան:
Ա.Ղարաբեկյանը նշեց, որ 10 տարի առաջ ստանձնել է նվագախմբի
գլխավոր դիրիժորի պարտականությունները, եւ ամեն ինչ արել է,
որպեսզի արվեստասեր հասարակությանը ներկայացվի բարձրակարգ
երաժշտություն: «Մենք հսկա ճանապարհ ենք անցել: Նվագախումբը
կայացել է եւ այսօր չի զիջում միջազգային ասպարեզում կամերային
որեւէ նվագախմբի»,- նշեց նա:
Տաս տարիների ընթացքում նվագախումբը ունեցել է բազմաթիվ
արտասահմանյան հյուրախաղեր եւ հանդես եկել լավագույն
համերգասրահներում: Բացի այդ, յուրաքանչյուր համերգաշրջանում
կազմակերպվել են արտագնա բարեգործական համերգներ Հայաստանի
մարզերում: Նշվեց, որ նվագախմբի պատվերով գրվել եւ կատարվել են 10
կոմպոզիտորների չորս տասնյակից ավելի ստեղծագործություններ:
Ա.Ղարաբեկյանը հայտնեց, որ հոբելյանական համերգի հաջորդ օրը
նվագախումբը կմեկնի Ֆրանսիա` մասնակցելու Հայաստանի տարվա
շրջանակներում կազմակերպվող միջոցառումներին: Նվագախումբը
ֆրանսիական տարբեր քաղաքներում կունենա 4 համերգ: Նշվեց նաեւ, որ
հուլիս ամսին կամերային նվագախումբը կմասնակցի «Սանկտ Պետերբուրգի
պալատներ» միջազգային փառատոնին: