ԸՍՏ ՀԲ-Ի ԶԵԿՈՒՅՑԻ, ՀԱՅԱՍՏԱՆՈՒՄ ԶԳԱԼԻՈՐԵՆ ԿՐՃԱՏՎԵԼ Է
ԱՂՔԱՏՈՒԹՅԱՆ ՄԱԿԱՐԴԱԿԸ
09-03-2007 18:29:00 | Հայաստան | Հասարակություն
ԵՐԵՎԱՆ, 9 ՄԱՐՏԻ, ՆՈՅՅԱՆ ՏԱՊԱՆ: Վերջին մի քանի տարվա
ընթացքում Հայաստանի բնակչության շրջանում աղքատությունը շուրջ
50%-ից կրճատվել է մինչեւ 30%, իսկ ծայրահեղ աղքատությունը` նվազել
մինչեւ 5%-ից պակաս մակարդակը: Այս մասին ասված է Հայաստանին
օժանդակության ռազմավարության իրականացման հաշվետվությունում, որը
Համաշխարհային բանկի տնօրենների խորհուրդը հաստատել է մարտի 8-ին:
Ըստ հաշվետվության, Հայաստանում զգալիորեն կրճատվել է աղքատության
մակարդակը, բավարար առաջընթաց է արձանագրվել նաեւ սոցիալական
ոլորտի ծախսերի ավելացման եւ բարեփոխումների իրականացման
ուղղությամբ:
Հայաստանում մեկ շնչի հաշվով ՀՆԱ-ի աճի եւ երկրի
վարկունակության բարձրացման պայմաններում, ըստ հաշվետվության,
երկիրը կարող է սկսել Վերակառուցման եւ զարգացման միջազգային բանկի
ոչ արտոնյալ պայմաններով սահմանափակ ֆինանսավորումից օգտվել` ի
լրումն Միջազգային զարգացման ընկերակցության կողմից ավելի
բարենպաստ պայմաններով տրամադրվող վարկավորման: Սա հստակ ազդանշան
է այն մասին, որ Հայաստանը միանում է միջին եկամտով երկրների
խմբին: Միաժամանակ, ինչպես նշված է զեկույցում, այդ անցումը պետք է
կատարվի աստիճանաբար` պարտքի վաղաժամկետ վերակազմավորումից
խուսափելու համար: