ՀԱՅԱՍՏԱՆԻ ԳՅՈՒՂՀԱՄԱՅՆՔՆԵՐԻ 75%-Ը ԸՆԴԳՐԿՎԱԾ Է «ՀԱԶԱՐԱՄՅԱԿԻ
ՄԱՐՏԱՀՐԱՎԵՐՆԵՐ» ԾՐԱԳՐՈՒՄ
23-02-2007 19:10:00 | Հայաստան | Տնտեսություն
ԵՐԵՎԱՆ, 23 ՓԵՏՐՎԱՐԻ, ՆՈՅՅԱՆ ՏԱՊԱՆ: Գյուղական բնակավայրերի
ենթակառուցվածքների զարգացման եւ աղքատության մակարդակի նվազեցման
նպատակով «Հազարամյակի մարտահրավերներ» ծրագրով Հայաստանին
հատկացվելիք 236 մլն ԱՄՆ դոլարից 67 մլն ԱՄՆ դոլարով նախատեսվում է
վերականգնել 943 կմ ընդհանուր երկարության ճանապարհներ, այդ թվում`
321 կմ-ը` հանրապետական, 622 կմ-ը` տեղական նշանակության: Այս
մասին փետրվարի 23-ին կազմակերպված քննարկման ժամանակ հայտնեց
ծրագրի իրականացնող` «Հազարամյակի մարտահրավեր
հիմնադրամ-Հայաստան», կազմակերպության գլխավոր գործադիր տնօրեն Արա
Հովսեփյանը: Նրա խոսքերով, համայնքային ճանապարհների վերականգնման
ծրագրի շահառուներ կդառնան 261 գյուղեր: Իսկ ընդհանուր առմամբ,
ծրագրի շահառու կդառնա հանրապետության գյուղբնակավայրերի մոտ
75%-ը:
Ըստ համայնքային ճանապարհների վերականգնման ծրագրի ղեկավար
Հակոբ Պետրոսյանի, ճանապարհների բարեկարգումը կնպաստի իրացվող
գյուղատնտեսական ապրանքի ինքնարժեքի նվազեցմանը, ինչպես նաեւ
գյուղաբնակների եկամուտների աճին:
Ոռոգման համակարգի զարգացման համար, ըստ ծրագրի ղեկավար
Տիգրան Քալանթարյանի, նախատեսվում է կառուցել 18 ինքնահոս
համակարգեր, վերակառուցել 58 պոմպակայաններ, 7 ջրամբարներ եւ 24
հազ. հեկտար դրենաժային համակարգեր:
«Հիմնական արդյունքը, որ մենք ակնկալում ենք ողջ ծրագրի
իրականցման հինգ տարիներին, գյուղական համայնքներում աղքատության
մակարդակի եւս 6%-ով կրճատումն է»,- նշեց Ա.Հովսեփյանը: