ՀԱՅԱՍՏԱՆՈՒՄ ԿԻՐԱԿԱՆԱՑՎԻ ՄԱՐԴՈՒ ԻՐԱՎՈՒՆՔՆԵՐԻ ՀԱՆՐԱՅԻՆ
ԻՐԱԶԵԿՄԱՆ ԿՐԹԱԿԱՆ ԾՐԱԳԻՐ
08-02-2007 15:55:00 | Հայաստան | Հասարակություն
ԵՐԵՎԱՆ, 8 ՓԵՏՐՎԱՐԻ, ՆՈՅՅԱՆ ՏԱՊԱՆ: ՄԱԿ-ի Զարգացման ծրագրի
(ՄԱԶԾ) եւ ՀՀ Մարդու իրավունքների պաշտպանի գրասենյակի միջեւ
փետրվարի 8-ին ստորագրվեց համագործակցության համաձայնագիր, ըստ որի
Հայաստանում կիրականացվի կրթական ծրագիր մարդու իրավունքների
պաշտպանության վերաբերյալ:
Ինչպես նշեց ՀՀ օմբուդսման Արմեն Հարությունյանը, ծրագրի
հիմնական բաղադրիչներից մեկը հանրային իրազեկության բարձրացմանն
ուղղված գործողություններն են: Մասնավորապես, կպատրաստվի եւ
Հանրային հեռուստատեսությամբ կհեռարձակվի թեմատիկ հաղորդումների
շարք: Հաղորդաշարի ընթացքում կներկայացվեն Հայաստանում մարդու
իրավունքներին վերաբերող կարեւորագույն հարցերը: «Ծրագրով
նախատեսված հեռուստահաղորդումների շնորհիվ մարդու իրավունքների
պաշտպանը հնարավորություն կստանա մեծացնել հաստատության
թափանցիկությունը, ինչպես նաեւ կատարված աշխատանքի համար հաշվետու
լինել ամբողջ հասարակությանը»,- ընդգծեց Ա.Հարությունյանը: Նա
համոզմունք հայտնեց, որ նման գործողությունները կարող են
բարձրացնել հասարակության իրավագիտակցության մակարդակը եւ մարդու
իրավունքները խթանող մշակույթ ձեւավորել:
Հայաստանում ՄԱԿ-ի եւ ՄԱԶԾ-ի գրասենյակի ղեկավար Կոնսուելո
Վիդալի խոսքերով, արվելու է հնարավորը բնակչության շրջանում`
ներառյալ ամենահեռավոր գյուղերում, մարդու իրավունքների վերաբերյալ
իրազեկվածության մակարդակը բարձրացնելու համար:
Ծրագրի ընդհանուր արժեքը կազմում է 500 հազար ԱՄՆ դոլար, որը
կտրամադրվի ՄԱԶԾ-ի, ՄԱԿ-ի Շվեդիայաի միջազգային զարգացման
գործակալության եւ ՀՀ կառավարության կողմից: Ծրագրի շրջանակներում
տեխնիկական օժանդակություն եւ սարքավորումներ կտրամադրվեն ՀՀ
Մարդու իրավունքների պաշտպանի գրասենյակի փաստագրական կենտրոնին: