Շրջանառության մեջ դրվեցին «Հայաստանը` շախմատի համաշխարհային
օլիմպիադայի կրկնակի չեմպիոն» թեմայով թողարկված նամականիշերը
29-07-2009 16:26:00 | Հայաստան | Սպորտ
ԵՐԵՎԱՆ, 29 ՀՈՒԼԻՍԻ, ՆՈՅՅԱՆ ՏԱՊԱՆ: Երեւանի շախմատի
կենտրոնական տանը հուլիսի 29-ին մարվեցին եւ շրջանառության մեջ
դրվեցին «Հայաստանը` շախմատի համաշխարհային օլիմպիադայի կրկնակի
չեմպիոն» թեմայով թողարկված երկու նամականիշերը: Պաշտոնական
արարողությունն իրականացրեցին ՀՀ տրանսպորտի եւ կապի նախարար
Գուրգեն Սարգսյանը, «Հայփոստ» ՓԲԸ-ի գլխավոր տնօրենի պաշտոնակատար
Արման Խաչատրյանը եւ Հայաստանի ֆիլատելիստների միության նախագահ
Հովիկ Մուսայելյանը:
Նամականիշներից մեկի վրա պատկերված է 2008թ.-ին Դրեզդենում
կայացած համաշխարհային օլիմպիադայում հաղթած Հայաստանի շախմատի
հավաքականն ու նրա մարզիչը, իսկ մյուսի վրա` շախմատային խաղաքարեր
եւ Դրեզդենի օլիմպիադայի խորհրդանիշը` հայկական դրոշի ֆոնի վրա:
Նամականիշներն ունեն 70 եւ 280 դրամ անվանագին, յուրաքանչյուրը
թողարկվել է 50 հազար տպաքանակով:
Գ.Սարգսյանը նշեց, որ այդ նամականիշերը եւս մեկ անգամ
հնարավորություն են տալիս վերհիշելու Հայաստանի հավաքականի
փառապանծ հաղթանակները: «Նամականիշերը խորհրդանշում են մեր
հաղթանակը եւ պատմության մեջ կմնան որպես հաղթական նամականիշեր»,-
ասաց նախարարը:
Ա.Խաչատրյանի խոսքերով, շախմատային թեման «Հայփոստի» թողարկած
նամականիշերում միշտ էլ իր ուրույն տեղն է ունեցել: «Այսպիսով
ցանկանում ենք մեծարել մեր շախմատիստներին եւ նպաստել Հայաստանում
շախմատային ավանդույթների շարունակմանն ու խթանմանը»,- ասաց նա: