ԱԻԲԱ-ի ներկայացուցիչները ծանոթացան բռնցքամարտի աշխարհի
պատանեկան առաջնության կազմակերպչական աշխատանքների ընթացքին
21-05-2009 19:00:00 | Հայաստան | Սպորտ
ԵՐԵՎԱՆ, 21 ՄԱՅԻՍԻ, ՆՈՅՅԱՆ ՏԱՊԱՆ: Մայիսի 21-ին Երեւան են
ժամանել ԱԻԲԱ-ի մի շարք անդամներ եւ միջազգային տեխնիկական
պաշտոնյաներ` Երեւանի Կարեն Դեմիրճյանի անվան մարզահամերգային
համալիրում մայիսի 23-30-ը կայանալիք բռնցքամարտի աշխարհի
պատանեկան առաջնության կազմակերպչական աշխատանքների ընթացքին ու
առկա հնարավորություններին ծանոթանալու նպատակով: Նրանք շրջել են
համալիրում, զրուցել կազմկոմիտեի անդամների հետ:
ԱԻԲԱ աշխարհի բռնցքամարտի պատանեկան առաջնության կայքի
թղթակցի հետ զրույցներում նրանք նրանք ներկայացրել են իրենց
տպավորությունները:
ՕՍՎԱԼԴՈ ԲԻՍԲԱԼ (տեխնիկական պատվիրակ)- Ամեն ինչ շատ լավ է
կազմակերպված: Ամենակարեւորն այն է, որ այստեղ մենք գտել ենք
առաջնությունը կազմակերպելու պատրաստ մարդկանց: ԱԻԲԱ-ի նախագահ
Չինգ Կո Վուն նույնպես վստահ է, որ Երեւանում ամեն ինչ լավ է
ընթանալու, եւ մենք արձանագրելու ենք մարզական մի հիանալի
իրադարձության կայացման փաստը:
ՕԼԱՖ ՎԵԼՏՄԱՆ (միջոցառման մենեջեր)- Մենք գոհ ենք ոչ միայն
ջերմ ընդունելությունից, այլեւ կատարված աշխատանքից:
ՄԱՆԳԱԼԴԱՍ ԿԻՇԵՆ (միջազգային տեխնիկական պաշտոնյա) - Շատ
տպավորված ենք ձեր մարզահամերգային համալիրով եւ այստեղ անցկացրած
մի քանի ժամվա ընթացքում արդեն հասկացել ենք, որ լավ ձեռքերում ենք
հայտնվել:
Հայաստանի բռնցքամարտի ֆեդերացիայի նախագահ Արման Մուրադյանը
ԱԻԲԱ-ի անդամների հետ հանդիպման ընթացքում նշել է, որ ամեն ինչ
արվելու է, որպեսզի նման խոշոր միջոցառումը Հայաստանում վերջինը
չլինի:
Ներկայացնելով աշխատանքների ընթացքը, ՀԲՖ-ի առաջին
փոխնախագահ, ԱԻԲԱ-ի միջազգային կարգի մրցավար Դերենիկ Գաբրիելյանը
նշել է, որ համալիրում հերթապահելու է բուժանձնակազմ, միեւնույն
ժամանակ երեւանյան լավագույն հիվանդանոցներից մեկում երեք
հիվանդասենյակ առանձնացվելու են հատուկ այն նպատակով, որպեսզի
հնարավոր լուրջ վնասվածքների դեպքում մարզիկներն անհրաժեշտ
օգնություն ստանան:
Մարզական անհրաժեշտ հանդերձանքը մատակարարելու է «Top Ten»
կազմակերպությունը: Հյուրանոցներում, որտեղ կհանգրվանեն մարզիկներն
ու առաջնությունը սպասարկող անձինք, ստեղծված են անվտանգության
բոլոր պայմանները. ոստիկանության ներկայացուցիչները կհերթապահեն 24
ժամ: Խցանումների մեջ չհայտնվելու եւ մրցումներից չուշանալու համար
ոստիկանությունը կուղեկցի նաեւ մրցավայր ժամանող թիմերին ու
մրցավարներին: