ԱՄՀ-ը հաստատելու է 540 մլն դոլար գումարով 28-ամսյա
պահուստային վարկավորման համաձայնագրի մասին Հայաստանի դիմումը
03-03-2009 16:06:00 | Հայաստան | Տնտեսություն
ԵՐԵՎԱՆ, 3 ՄԱՐՏԻ, ՆՈՅՅԱՆ ՏԱՊԱՆ: Արժույթի միջազգային
հիմնադրամի (ԱՄՀ) կառավարիչ-տնօրեն Դոմինիկ Ստրաուս-Քանը
առաջարկելու է ԱՄՀ-ի Գործադիր խորհրդին հաստատել 540 մլն դոլար
գումարով, 28-ամսյա պահուստային վարկավորման համաձայնագրի
(Stand-By Arrangement) մասին Հայաստանի դիմումը: Իր այս որոշումը
մարտի 3-ի հայտարարությունում ԱՄՀ-ի կառավարիչ-տնօրենը հիմնավորել
է այն հանգամանքով, ի պատասխան համաշխարհային տնտեսական եւ
ֆինանսական ճգնաժամի բացասական ազդեցության «Հայաստանի
իշխանությունները կազմել են կենսունակ եւ վստահելի տնտեսական
ծրագիր` Հայաստանի արտաքին հեռանկարների վատթարացման, արժույթի եւ
ֆինանսական համակարգի նկատմամբ վստահության վերականագնման եւ աղքատ
խավի պաշտպանության խնդիրներին անդրադառնալու համար»:
Ըստ ԱՄՀ-ի մամլո հաղորդագրություն, ակնկալվում է, որ Գործադիր
խորհուրդն այս շաբաթվա վերջում նիստ կգումարի` ծրագիրը քննարկելու
համար: Խորհրդի հաստատումից հետո Հայաստանը կկարողանա անմիջապես
փոխառել շուրջ 239 մլն ԱՄՆ դոլար:
ԱՄՀ-ի աշխատակիցների հետ խորհրդակցելով Հայաստանի
իշխանությունների մշակած քաղաքականության համակողմանի փաթեթը
ներառում է վերադարձը լողացող փոխարժեքի ռեժիմին (թույլ տալով, որ
փոխարժեքը փոփոխվի շուկայի հիմնարար սկզբունքներին համապատասխան`
արտաքին ցնցումներից տնտեսությունը պաշտպանելու եւ արտարժութային
պահուստները պահպանելու նպատակով), ինչպես նաեւ դրամավարկային,
հարկաբյուջետային եւ ֆինանսական ոլորտների օժանդակող
քաղաքականություն եւ խիստ հասցեական կառուցվածքային բարեփոխումներ:
Ըստ ԱՄՀ-ի, Հայաստանի իշխանությունները նաեւ ձեռնարկում են
տնտեսական անկումը չեզոքացնելու եւ աղքատ խավի վրա տնտեսական
ճգնաժամի ազդեցությունը մեղմելու միջոցառումներ:
«Իշխանությունների կողմից ձեռնարկվող վճռական միջոցառումները
հիմնավորում են Հիմնադրամի միջոցների հասանելիության բացառիկ
մակարդակը (որը համարժեք է Հայաստանի քվոտայի 400 տոկոսին) եւ
արժանի են միջազգային հանրության օժանդակությանը»,- նշել է
Դ.Ստրասուս-Քանը: