2007 Թ. ՀՈՒՆԻՍԻՆ ՍՏԱՄԲՈՒԼՈՒՄ ԾՐԱԳՐՎՈՒՄ Է ԱՆՑԿԱՑՆԵԼ ՍՏՀԿ
15-ԱՄՅԱԿԻՆ ՆՎԻՐՎԱԾ ՄԻՋՈՑԱՌՈՒՄՆԵՐ
01-11-2006 16:26:00 | Թուրքիա | Միջազգային
ԱՆԿԱՐԱ, 1 ՆՈՅԵՄԲԵՐԻ, ՆՈՅՅԱՆ ՏԱՊԱՆ: 2007 թվականին
Թուրքիայում ծրագրվում է անցկացնել Սեւծովյան տնտեսական
համագործակցության կազմակերպության (ՍՏՀԿ) ստեղծման 15-ամյակին
նվիրված միջոցառումներ: Ինչպես հաղորդում է AT գործակալությունը,
ՍՏՀԿ գլխավոր քարտուղարի առաջին տեղակալ Մուրադ Սունգարը
լրագրողներին հայտարարել է, որ միջոցառումների շրջանակում 2007
թվականի հունիսին Ստամբուլում նախատեսվում է կազմակերպել նաեւ
պետությունների եւ կառավարությունների ղեկավարների գագաթնաժողով:
Հիշեցնելով, որ կազմակերպությունը բարդ փուլեր է անցել,
Սունգարը նշել է, որ ֆինանսական դժվարությունների պատճառով մի շարք
նախագծեր չեն իրականացվել: Ըստ նրա, տվյալ հարցերը կքննարկվեն ՍՏՀԿ
անդամ երկրների արտաքին գործերի նախարարների նիստում, որը կկայանա
նոյեմբերի 1-2-ը Մոսկվայում: Այդ նիստը կլինի եզրափակիչ
միջոցառումը տվյալ կառույցում Ռուսաստանի նախագահության
ժամանակամիջոցում: Քննարկման հիմնական թեման Սեւ, Կասպից եւ
Միջերկրական ծովերի նավահանգիստները միացնող ցանցի ստեղծման հարցն
է: Սուգարն ընդգծել է, որ անդամ երկրները ապագայում վերաբերմունք
կարտահայտեն նաեւ քաղաքական հարցերի նկատմամբ, եւ չի բացառել ՍՏՀԿ
կազմում մշակույթի հանձնաժողովի ստեղծման հնարավորությունը:
Նշենք, որ ՍՏՀԿ անդամ են 12 երկրներ` Ադրբեջանը, Հայաստանը,
Ալբանիան, Բուլղարիան, Հունաստանը, Վրաստանը, Մոլդավիան,
Ռուսաստանը, Ռումինիան, Սերբիան, Թուրքիան, Ուկրաինան: