ՎՈՒԱՄԸ ԴԻՄՈՒՄ Է ՄԱԿ-ԻՆ ՕԳՆԵԼՈՒ ԼՈՒԾԵԼ ՀԱԿԱՄԱՐՏՈՒԹՅՈՒՆՆԵՐԸ
01-09-2006 19:55:00 | Ադրբեջան | Միջազգային
ԲԱՔՈՒ, 1 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: «ՎՈՒԱՄ -
Ժողովրդավարության եւ տնտեսական զարգացման կազմակերպությունը»
նորից դիմել է ՄԱԿ Գլխավոր վեհաժողովին ՎՈՒԱՄ-ի տարածքում ձգձգված
հակամարտությունների եւ միջազգային խաղաղության, անվտանգության եւ
զարգացման համար դրանց հետեւանքների հարցը 61-րդ նստաշրջանի
օրակարգում ընդգրկելու խնդրանքով:
«ՎՈՒԱՄ տարածության ձգձգված հակամարտությունները, այն է`
Մոլդովայում, Վրաստանում եւ Ադրբեջանում, ավելի քան 15 տարի
շարունակում են բացասաբար անդրադառնալ ավելի քան 16 մլն. մարդկանց
կյանքի վրա եւ վտանգի ենթարկել միջազգային խաղաղությունն ու
անվտանգությունը` սպառնալով ՄԱԿ-ի անդամ երեք պետությունների
ինքնիշխանությանը եւ տարածքային ամբողջականությանը»,- ասվում է
ուղերձում:
Ադրբեջանը, Վրաստանը, Մոլդովան եւ Ուկրաինան կարծում են, որ
միջազգային միջնորդությունը այդ հակամարտությունների լուծման
հարցում որեւէ արդյունք չի տվել: Ուստի եւ նրանք առաջարկում են
առաջնային կարգով այդ հարցը քննության առնել ՄԱԿ Գլխավոր
վեհաժողովի 61-րդ նստաշրջանում: