ԱԴՐԲԵՋԱՆԻ ՆԱԽԱԳԱՀԻ ԱՇԽԱՏԱԿԱԶՄԻ ՆԵՐԿԱՅԱՑՈՒՑՉԻ ԿԱՐԾԻՔՈՎ,
ՂԱՐԱԲԱՂՅԱՆ ԳՈՐԾԸՆԹԱՑԻ ՎԵՐԱԲԵՐՅԱԼ ՇԱՏ ՀԱՅՏԱՐԱՐՈՒԹՅՈՒՆՆԵՐ ՉԵՆ
ԱՐՏԱՑՈԼՈՒՄ ԻՐԱԿԱՆՈՒԹՅՈՒՆԸ
01-08-2006 17:30:00 | Ադրբեջան | Միջազգային
ԲԱՔՈՒ, 1 ՕԳՈՍՏՈՍԻ, ՆՈՅՅԱՆ ՏԱՊԱՆ: Ղարաբաղյան գործընթացին
առնչվող վերջին աղմկահարույց արտահայտությունների մեծ մասը
իրականությունը չի արտացոլում: Այս մասին «Թրենդին» հայտարարել է
Ադրբեջանի նախագահի գործադիր աշխատակազմի արտաքին կապերի բաժնի
վարիչ Նովրուզ Մամեդովը:
Անդրադառնալով ԵԱՀԿ Մինսկի խմբի ամերիկացի համանախագահ Մեթյու
Բրայզայի վերջին հայտարարություններին, Ն.Մամեդովն ասել է, որ
Մ.Բրայզային համանախագահ նշանակելով` ԱՄՆ-ը ցանկանում է ավելի
ակտիվ լինել բանակցային գործընթացում: «Այդուհանդերձ Մեթյու
Բրայզան ուզում է հայտարարել, որ ծանոթ է բանակցային գործընթացին
եւ ցանկանում է նրա առաջխաղացում: Ուստի նա քննարկման ներկայացրեց
տարբեր գաղափարներ, որոնք ոչ Հայաստանի դիրքորոշումն են, ոչ
Ադրբեջանի: Հնարավոր է, դրանք հենց Մ.Բրայզայի եւ նույնիսկ ԵԱՀԿ
Մինսկի խմբի համանախագահների դիրքորոշումն է, դատողությունները:
Ուստի այժմ անհրաժեշտություն չկա դրանց առնչությամբ դիրքորոշում
հայտնելու կարծիք ձեւավորելու համար»,- ասել է Ն.Մամեդովը եւ
հիշեցրել, որ բանակցային գործընթացը տեղի է ունենում փակ դռների
ետեւում:
Ն.Մամեդովի կարծիքով, Հայաստանի նախագահը եւ ԱԳՆ ղեկավարը
այսօր շատ մեծ ճնշման են ենթարկվում համաշխարհային հանրության,
Մինսկի խմբի համանախագահների կողմից, ինչպես նաեւ աշխարհում
Ադրբեջանի վարկի ու կշռի, դիրքորոշման տեսանկյունից: «Այդ պատճառով
նրանք այժմ շփոթված են եւ գտնվում են փակուղում»,- ասել է
Ն.Մամեդովը եւ նշել, որ հակամարտությունը պետք է լուծվի, գրավյալ
հողերը` ազատագրվեն, Ադրբեջանի տարածքաիյն ամբողջականությունը`
վերականգնվի, ինչի մասին հայտարարում են ԱՄՆ-ի ղեկավարությունը եւ
մնացած բոլոր երկրները:
«Հայերն իրենք երկյուղում են, որ եթե համաձայնության չգան
Ադրբեջանի հետ, ապա իրադարձությունների զարգացումը այլ տարբերակով
նրանց կհանգեցնի աղետի»,- ամփոփել է նա: