«ԹԵԵՎ ՈՒՆԵՆՔ ԼԱՎ ԲԱՆԱՍՏԵՂԾՆԵՐ ԵՎ ԿՈՄՊՈԶԻՏՈՐՆԵՐ, ԲԱՅՑ
ՀԱՄՈԶՎԱԾ ՉԵՄ, ՈՐ ԼԱՎ ՀԻՄՆ ԿԳՐՎԻ»,- ԱՍՈՒՄ Է ՆԿԱՐԻՉ ՀԵՆՐԻԿ
ԳԱԼՈՒԿՅԱՆԸ
23-06-2006 18:35:00 | Հայաստան | Մշակույթ
ԵՐԵՎԱՆ, 23 ՀՈՒՆԻՍԻ, ՆՈՅՅԱՆ ՏԱՊԱՆ: «Ես Արամ Խաչատրյանի
երաժշտության երկրպագուներից եմ եւ բարձր եմ գնահատում նրա
հանճարը, բայց նրա գրած հիմնը ինձ վրա թողնում է բանակային մարշի
տպավորություն»: Այսպիսի կարծիք հայտնեց հունիսի 23-ի ասուլիսում
բանաստեղծ Ռազմիկ Դավոյանը: Նրա խոսքերով, «Ա.Խաչատրյանի հիմնը
գրված է գլխով, բայց դրա մեջ սիրտ չկա»:
Թեեւ Ռ.Դավոյանը ՀՀ օրհներգի տեքստի եւ երաժշտության
ընտրության նպատակով ստեղծված հանձնաժողովի անդամ է, սակայն գտնում
է, որ հիմնի ստեղծման համար անիմաստ է մրցույթ հայտարարելը եւ
ժամկետներ դնելը: «Հիմնը մեկ օրում չի ծնվում եւ զարմանում եմ, թե
ինչպես կարելի է նստել սեղանի մոտ եւ հիմն գրել: Հիմնի համար տեքստ
գրելու առաջարկ ինձ նույնպես արել են, բայց մերժել եմ»,- նշեց
բանաստեղծը:
«Մենք հաճախ ենք ասում «Մայր Հայաստան», եւ կարծում եմ, որ
օրհներգը պետք է լինի մոր մասին երգ: Եվ պետք է ունենանք այնպիսի
մի հիմն, որ երգեն նաեւ նախադպրոցական տարիքի երեխաները»,- ընդգծեց
Ռ.Դավոյանը:
Բանաստեղծի խոսքերով, մինչեւ մրցույթի ավարտը, բնականաբար,
կներկայացվեն բազմաթիվ ստեղծագործություններ, սակայն հնարավոր է,
որ ոչ մի ստեղծագործություն չհամապատասխանի մրցույթի պահանջներին:
Նկարիչ Հենրիկ Գալուկյանն էլ է գտնում, որ օրհներգի ստեղծման
համար մրցույթ հայտարարելը անիմաստ է: Նա հիշեցրեց, որ Կոմիտասի
արձանի ստեղծման համար խորհրդային տարիներին նույնպես մրցույթ էր
հայտարարվել, եւ ներկայացված գործերից ոչ մեկը չարժանացավ առաջին
մրցանակի: «Թեեւ ունենք շատ լավ բանաստեղծներ եւ կոմպոզիտորներ,
համոզված չեմ, որ լավ հիմն կգրվի»,- ասաց Հ.Գալուկյանը: