ԱԴՐԲԵՋԱՆԻ ԱԳՆ. ԼԵՌՆԱՅԻՆ ՂԱՐԱԲԱՂԻ ՊԱՏՎԻՐԱԿՈՒԹՅԱՆ ԱՅՑԸ ԱՄՆ ՉԻ
ՓՈԽԻ ՎԱՇԻՆԳՏՈՆԻ ՔԱՂԱՔԱԿԱՆՈՒԹՅՈՒՆԸ ՂԱՐԱԲԱՂՅԱՆ ՀԱԿԱՄԱՐՏՈՒԹՅԱՆ
ՆԿԱՏՄԱՄԲ
23-06-2006 17:57:00 | Ադրբեջան | Միջազգային
ԲԱՔՈՒ, 23 ՀՈՒՆԻՍԻ, ՆՈՅՅԱՆ ՏԱՊԱՆ: Լեռնային Ղարաբաղի
պատվիրակության այցը ԱՄՆ չի փոխի Վաշինգտոնի քաղաքականությունը
ղարաբաղյան հակամարտության նկատմամբ: Այս մասին «Թրենդին» հայտնել
է Ադրբեջանի ԱԳՆ մամուլի եւ տեղեկատվական քաղաքականության
վարչության պետ Թայիր Թաղիզադեն:
Նշենք, որ հունիսի 23-30-ը Լեռնային Ղարաբաղի Հանրապետության
խորհրդարանի խոսնակը եւ արտաքին գործերի նախարարը կայցելեն Բոստոն,
Նյու Յորք եւ Վաշինգտոն: Առաքելությունը հանդիպումներ կունենա
ԱՄՆ-ի նախագահ Ջորջ Բուշի վարչակազմի ներկայացուցիչների, Կոնգրեսի
անդամների եւ հայ համայնքի հետ:
Ըստ Թ.Թաղիզադեի, «Կապիտոլիումում սովորաբար նման
առաքելությունները հանդիպում են հայամետ կոնգրեսականների հետ,
ինչպիսին են Ֆրենկ Պալլոնեն եւ ուրիշներ: Ինչ վերաբերում է
վարչակազմին, ապա նրանք ոչ պաշտոնական պայմաններում հանդիպում են
ԵԱՀԿ ՄԽ-ի ամերիկացի համանախագահի, այն անձի հետ, որն ունի
բանակցություններ վարելու մանդատ:
«Ամերիկյան կողմը քանիցս մեզ հավաստիացրել է, որ ԱՄՆ-ի
քաղաքականության մեջ նման հանդիպումները աշխատանքային բնույթ ունեն
եւ պաշտոնական չեն համարվում: Նման հանդիպումները չեն անդրադառնում
ԱՄՆ-ի վարչակազմի քաղաքականության վրա, որ ուղղված է Ադրբեջանի
տարածքային ամբողջականության պահպանմանը եւ ինքնահռչակ Լեռնային
Ղարաբաղի Հանրապետության չճանաչմանը»,- ամփոփել է Թ.Թաղիզադեն: