ԵՐԵՎԱՆՈՒՄ ԲԱՑՎԵՑ ՏԻԳՐԱՆ ՊԵՏՐՈՍՅԱՆԻ ԿԻՍԱՆԴՐԻՆ. ԸՍՏ ՍԵՐԺ
ՍԱՐԳՍՅԱՆԻ, ԱՇԽԱՐՀԻ ՉԵՄՊԻՈՆ ԴԱՌՆԱԼՈՒ ՀՆԱՐԱՎՈՐՈՒԹՅՈՒՆՆԵՐ ՈՒՆԻ ՆԱԵՎ
ԼԵՎՈՆ ԱՐՈՆՅԱՆԸ
08-06-2006 19:10:00 | Հայաստան | Հասարակություն
ԵՐԵՎԱՆ, 8 ՀՈՒՆԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Հունիսի
7-ին Երեւանի Դավիթաշեն համայնքում գտնվող Տիգրան Պետրոսյանի անվան
փողոցում բացվեց հայ տաղանդավոր շախմատիստ, շախմատի աշխարհի
չեմպիոն Տիգրան Պետրոսյանի բրոնզաձույլ կիսանդրին, որի հեղինակն է
քանդակագործ Նորայր Կարգանյանը: Քանդակը ստեղծվել է ՀՀ
պաշտպանության նախարարության եւ Երեւանի քաղաքապետարանի
հովանավորությամբ:
Ինչպես նշեց քանդակագործը, արձանը դեռ ավարտված չէ:
Պաշտպանության նախարարի համաձայնությամբ, արձանի ներքեւի մասում
կավելացվեն «մտածող երիտասարդների» ֆիգուրներ, որոնց վերեւից
«կհսկի» «շախմատի արքան»: Քանդակագործն ընդգծեց նաեւ, որ «նշանավոր
մարդը պետք է ժամանակի ընթացքում փորձառություն ձեռք բերի եւ ոչ մի
բիծ չունենա իր կենսագրության մեջ: Տիգրան Պետրոսյանը հենց
այդպիսին էր, որի արձանը քանդակելու համար համարձակություն էր
պետք»:
Արձանի բացմանը մասնակցում էին պաշտպանության նախարար,
Հայաստանի Շախմատի ֆեդերացիայի նախագահ Սերժ Սարգսյանը, Երեւանի
քաղաքապետ Երվանդ Զախարյանը, Դավիթաշեն համայնքի ղեկավար Սուրիկ
Ղուկասյանը, օլիմպիական չեմպիոն դարձած Հայաստանի շախմատի
հավաքականի անդամները եւ այլոք:
Ինչպես նշեց Երեւանի քաղաքապետը, վերջին տասնամյակում շախմատի
ասպարեզում Հայաստանի ունեցած բոլոր հաջողությունները կապված են
Տիգրան Պետրոսյանի կատարած աշխատանքի հետ: Եւ այսօրվա Թուրինի
հաջողությունները, ըստ նրա, Տիգրան Պետրոսյանի հաջողությունների
շարունակությունն են:
Սերժ Սարգսյանի բնորոշմամբ, ոչ հեռավոր ապագայում աշխարհի
չեմպիոն դառնալու բոլոր հնարավորություններն ունի Լեւոն Արոնյանը:
Հիշեցնենք, որ Նորայր Կարգանյանը նաեւ Երեւանում տեղադրված
մարշալ Բաղրամյանի արձանի հեղինակն է: