ԳՅՈՒՄՐԻ, 29 ՄԱՅԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Գյումրիում
հուշարձանների թիվն ավելացավ եւս մեկով: Թիվ 41 դպրոցի բակում
մայիսի 29-ին տեղադրվեց Խրիմյան Հայրիկի կիսանդրին: Երջանկահիշատակ
կաթողիկոսի անունը կրող դպրոցի համար այս իրադարձությունն, ըստ
մանկավարժների, պարտավորեցնող է:
Լինելով հոգեւորական` Ամենայն Հայոց կաթողիկոս Խրիմյան
Հայրիկը պայքարել է ազգային սահմանադրության վերանայման,
գավառաբնակ արեւմտահայության պատվիրակների թիվը Ազգային ժողովում
համալրելու ուղղությամբ: Եռանդուն պայքար է մղել եկեղեցապատկան
ունեցվածքը բռնագրավելու մասին ցարական օրենքի դեմ, քննադատել է
եվրոպական մոտեցումները` կապված հայկական հարցի հետ:
Ինչպես նշեց դպրոցի տնօրեն Արտակ Ավետիսյանը, Խրիմյան Հայրիկի
մեծությունն իրոք բացառիկ է, նա կարողացավ հոգեւորականի
կապանքներից ձերբազատվելով գնալ դեպի ժողովուրդը եւ ժողովրդի մեջ
ներարկել հայրենասիրական ոգի:
«Ուզեցել եմ մարմնավորել մեր` հայերիս անկոտրում կամքը եւ
խիղճը, եւ իմ աշխատանքի արդյունքը կլինի այն, որ մատաղ սերունդը
այսուհետ Վեհափառի անունը արտասանելիս անի դա որպես երդում»,-
բացման օրը նշեց քանդակի հեղինակ Արթուր Հովհաննիսյանը: