«ԴԵՂԻՆ ԹՌՉՈՒՆ»-Ի ՀԻՄՆԱԿԱՆ ԱՌԱՔԵԼՈՒԹՅՈՒՆՆ Է ՊԱՀՊԱՆԵԼ ԵՎ
ՍԵՐՈՒՆԴՆԵՐԻՆ ՓՈԽԱՆՑԵԼ ԱՄԵՐԻԿՅԱՆ ՀՆԴԿԱՑԻՆԵՐԻ ԱՎԱՆԴՈՒՅԹՆԵՐԸ
25-05-2006 17:15:00 | Հայաստան | Մշակույթ
ԵՐԵՎԱՆ, 25 ՄԱՅԻՍԻ, ՆՈՅՅԱՆ ՏԱՊԱՆ: «Ինձ համար մեծ պատիվ է
գտնվել ձեր երկրում: Այստեղ մարդիկ ջերմ են եւ հյուրընկալ: Ուրախ
եմ, որ գտնվում եմ հեռավոր ու հյուրընկալ Հայաստանում»,-
հայտարարեց «Դեղին թռչուն» ապաչիների պարային խմբի ղեկավար Քենեթ
Դունկանը մայիսի 25-ին Երեւանում կայացած ասուլիսին:
Քենեթ Դունկանի խոսքերով, «Դեղին թռչուն» պարային խումբը
կարելի է համարել նաեւ ընտանեկան խումբ, քանի որ նրանում ընդգրկված
են իր կինը, դուստրը եւ յոթ որդիները: Իսկ խմբի անվանումն իր կնոջ
օրիորդական ցեղի անվանումն է: 20 տարվա ստեղծագործական պատմություն
ունեցող ապաչիական այս խմբում բացի ընտանիքի անդամներից հանդես են
գալիս նաեւ այլ ցեղերի ապաչիներ:
Ըստ Քենեթ Դունկանի, պարային խմբի առաջնային առաքելությունն է
պահպանել ամերիկյան հնդիկների ավանդույթները եւ փոխանցել հաջորդ
սերունդներին: Նա նշեց, որ բացի պարային համարներից իրենց խումբը
ներկայացնում է նաեւ հինավուրց պատմություններ եւ
ցուցադրություններ այդ թեմաներով:
Դունկանի խոսքերով, որպես ամերիկացի բնիկների պարային խումբ`
իրենք երաժշտական եւ պարային համարների միջոցով են ներկայացնում
բնության տարբեր երեւույթները: Իսկ մշակույթը, ըստ նրա, կարեւոր է
նրանով, որպեսզի յուրաքանչյուր ոք հասկանա, թե «որտեղից է գալիս եւ
ուր է գնում»: Բացի համերգային առաքելությունից, խումբը աշխարհի
տարբեր երկրներում կառուցում է ապաչիական գյուղեր եւ ավաններ`
իրենց նախնիների ավանդույթների համաձայն:
Դունկանի որդիներից մեկը ներկայացրեց իր երաժշտական գործիքը`
ամերիկյան բնիկներին պատկանող սրինգը, որով եւ կատարեց մի
հետաքրքիր երաժշտական համար. երբ տղան որոշում է սիրահետել աղջկան,
սկսում է սրինգ նվագել եւ այն չորրորդ կատարումից հետո ուղղում է
դեպի ընտրած աղջիկը:
Ինչ վերաբերում է ժամանակակից տեխնիկայի եւ ապաչիական
ավանդույթների մեկտեղման խնդրին, ապա, Քենեթ Դունկանի խոսքերով,
իրենք ապրում եւ ստեղծագործում են` օգտագործելով երկու
տարբերակներն էլ. օրինակ, «երբ գալիս է, ասենք, երիտասարդ
աղջիկների արբունքի շրջանը, ամբողջ ցեղը բարձրանում է լեռները եւ
կատարում ավանդական ծիսակատարություններ»: Իսկ մնացած դեպքերում,
իհարկե, օգտվում են նաեւ տեխնիկայի միջոցներից:
Այսօր ԱՄՆ-ում ապրում են 50 հազար ապաչիներ, որոնք սուվերեն
կարգավիճակ ունեն այնտեղ:
«Դեղին թռչուն» խումբն այս տարիների ընթացքում համերգային
շրջագայություններ է ունեցել աշխարհի տարբեր երկրներում:
Հայաստանյան հյուրախաղերից անմիջապես հետո նրանք պետք է մեկնեն
Անգլիա: