«ԱԶԳԱՅԻՆ ՊԱՏԿԵՐԱՍՐԱՀ» ՓԱՌԱՏՈՆԻ ՇՐՋԱՆԱԿՈՒՄ ՄԱՅԻՍԻ 26-ԻՆ
ԿԿԱՅԱՆԱ ՖՐԱՆՍԱԲՆԱԿ ԴԱՇՆԱԿԱՀԱՐ ՎԱՐԴԱՆ ՄԱՄԻԿՈՆՅԱՆԻ ՄԵՆԱՀԱՄԵՐԳԸ
25-05-2006 15:48:00 | Հայաստան | Մշակույթ
ԵՐԵՎԱՆ, 25 ՄԱՅԻՍԻ, ՆՈՅՅԱՆ ՏԱՊԱՆ: «Ազգային պատկերասրահ»
դասական երաժշտության երկրորդ փառատոնի շրջանակում մայիսի 26-ին
կկայանա ֆրանսաբնակ դաշնակահար Վարդան Մամիկոնյանի մենահամերգը:
Հայաստանի Ազգային պատկերասրահում նա կկատարի Լիստի, Շոպենի,
Դեբյուսիի եւ Ռավելի ստեղծագործությունները:
Վ.Մամիկոնյանը մի շարք միջազգային մրցույթների դափնեկիր է:
Դաշնակահարը հանդես է եկել Նյու Յորքի, Մյունխենի, Լոնդոնի
հեղինակավոր բեմերում: Որպես մենակատար համերգներ է ունեցել Սանկտ
Պետերբուրգի Մարիինյան թատրոնի, Հյուսթոնի, Վաշինգտոնի սիմֆոնիկ եւ
այլ նվագախմբերի հետ:
Դաշնակահարը հայրենիքում մենահամերգով ներկայանում է առաջին
անգամ: «20 տարի է Հայաստանում չեմ եղել եւ անհամբեր սպասում եմ
այդ համերգին: Հուսով եմ, որ այն դուր կգա հայ հանդիսատեսին: Ուրախ
եմ, որ Հայաստանում դասական երաժշտության երկրպագուները մեծ թիվ են
կազմում»,- նշեց Վ.Մամիկոնյանը մայիսի 25-ի ասուլիսում:
ԽՍՀՄ ժողովրդական արտիստ, կոմպոզիտոր Էդվարդ Միրզոյանի
խոսքերով, Վ.Մամիկոնյանը տաղանդավոր դաշնակահար է, եւ հայ
հանդիսատեսը վերջապես հնարավորություն կունենա ունկնդրելու նրա
անզուգական կատարումը:
ՀՀ Մշակույթի եւ երիտասարդության հարցերի նախարարության
Մշակութային քաղաքականության վարչության պետ Կարո Վարդանյանի
խոսքերով, Հայաստանում երկրորդ անգամ կազմակերպվող «Ազգային
պատկերասրահ» դասական երաժշտության փառատոնի ինքնատիպությունը
կայանում է նրանում, որ պատկերասրահ այցելող կերպարվեստի
սիրահարներին հնարավորություն է տրվում ծանոթանալ նաեւ հայ
տաղանդավոր երաժիշտների արվեստին: