ԱՐՏԱՇԱՏ, 18 ՄԱՅԻՍԻ, ՆՈՅՅԱՆ ՏԱՊԱՆ: Արտաշատի «Մանկան մոլորակ»
տիկնիկային թատրոնը երկու տարեկան է: Կարճ կենսագրության
ընթացքում, սակայն, թատրոնը հասցրել է տալ 200 ներկայացում, որոնք
դիտել են ոչ միայն Արարատի, այլեւ Սյունիքի եւ Վայոց Ձորի մարզերի
երեխաները:
Խաղացանկն ընտրելիս թատրոնի գեղարվեստական ղեկավար Քաջիկ
Ավետիսյանը, դերասանուհիներ Լուսինե Գրիգորյանը, Աիդա Ալեքսանյանը,
Սեդա Բաբայանը նախապատվությունը տալիս են հայ գրողների մանկական
ստեղծագործություններին` ընդգրկելով նաեւ այլ ժողովուրդների
մանկագիրների գործերը: Երեխաների շրջանում մեծ ընդունելություն են
գտնում «Չարի վերջը», «Ոսկու կարասը», «Թագավորն ու չարչին»,
«Կիկոսի մահը», «Ագահ մարդը», «Երեք խոզուկները», «Կարմիր գլխարկը»
եւ այլ հեքիաթների բեմադրությունները:
Տիկնիկային թատրոնն արդեն ստեղծագործական կապերի մեջ է
Երեւանի Հովհաննես Թումանյանի անվան Պետական տիկնիկային թատրոնի,
Երվանդ Մանարյանի ղեկավարած «Ագուլիս» թատրոնի եւ խամաճիկների
թատրոնի հետ: Արտաշատի տիկնիկային թատրոնը Տիկնիկագործների
համահայկական փառատոնում արժանացել է դափնիների եւ բնագավառի
ճանաչված մասնագետների դրվատանքին:
Շուտով կբեմադրվեն «Ոսկե ձկնիկը», «Օձ կինը» եւ «Քաջ Նազար»-ի
փոքր-ինչ փոփոխված տարբերակ «Վախկոտ Ղազարը» պիեսները: Ծրագրված են
հյուրախաղեր հարեւան մարզերում, ինչպես նաեւ Արցախում եւ
Ջավախքում: