ԳԵՐՄԱՆԻԱՅՈՒՄ ԹՈՂԱՐԿՎԵԼ Է ԿՈՄԻՏԱՍԻ «ՊԱՏԱՐԱԳԻ» CD-Ն` «ՀՈՎԵՐ»
ԿԱՄԵՐԱՅԻՆ ԵՐԳՉԱԽՄԲԻ ԿԱՏԱՐՄԱՄԲ
11-05-2006 16:10:00 | Հայաստան | Մշակույթ
ԵՐԵՎԱՆ, 11 ՄԱՅԻՍԻ, ՆՈՅՅԱՆ ՏԱՊԱՆ: Պրոֆեսոր Հրանտ Խաչատրյանի
նախաձեռնությամբ ԱՄՆ-ի Սթենֆորդի համալսարանի «Ֆլորա ընտանիքի
հիմնադրամ»-ի պատվերով «Հովեր» կամերային երգչախմբի արական կազմի
կատարմամբ ձայնագրվել եւ թողարկվել է Կոմիտասի «Պատարագի» CD-ն:
Ձայնագրությունը կատարվել է Հայաստանում` «Վեմ» ստուդիայում, իսկ
յուրաքանչյուրը 54 րոպե տեւողությամբ 2 CD-ից կազմված ալբոմը
թողարկվել է Գերմանիայում:
Ինչպես մայիսի 11-ի ասուլիսում հայտնեց «Հովեր» երգչախմբի
տնօրեն Արման Պադարյանը, 3000 ձայնասկավառակներից մոտ 600-ն արդեն
անվճար առաքվել են աշխարհի կարեւորագույն մշակութային օջախներին եւ
համալսարաններին: Մի քանի շաբաթից 1000 սկավառակներ կվաճառվեն
www.amazon.com վեբ կայքի միջոցով, իսկ 1000-ը կտրամադրվի
երգչախմբին:
Երգչախմբի մենակատար Վահե Բեգոյանի խոսքերով, Կոմիտասի այս
ստեղծագործությունը 1933թ.ին առաջին անգամ հրատարակության է
պատրաստել Կոմիտասի աշակերտը` Վարդան Սարգսյանը: 1997թ.-ին
երաժշտագետ Ռոբերտ Աթայանը պատրաստել եւ հրատարակել է «Պատարագի»
մեկ այլ տարբերակը, որտեղ հաշվի են առնվել Կոմիտասի այն
գրառումներն ու նշումները, որոնք պահպանվում են Վենետիկի Սուրբ
Ղազար կղզու ձեռագրատանը: Հենց Ռ.Աթայանի հրատարակությունից էլ
օգտվել է երգչախումբը, քանի որ այն նախատեսված է արական փոքր
երգչախմբի համար: