ՀԱՅ-ԲՈՒԼՂԱՐԱԿԱՆ ՄՇԱԿՈՒԹԱՅԻՆ ՀԱՄԱԳՈՐԾԱԿՑՈՒԹՅԱՆ ԱՎԱՆԴԱԿԱՆ
ԴԱՐՁԱԾ ՈՒՂՂՈՒԹՅՈՒՆՆԵՐԻՆ ԿԱՎԵԼԱՆԱՆ ՆԱԵՎ ՕՊԵՐԱՅԻՆ ԱՐՎԵՍՏՆ ՈՒ
ԹԱՏԵՐԱՐՎԵՍՏԸ
28-02-2006 17:35:00 | Հայաստան | Մշակույթ
ԵՐԵՎԱՆ, 28 ՓԵՏՐՎԱՐԻ, ՆՈՅՅԱՆ ՏԱՊԱՆ: Բուլղարիայի մշակույթի
նախարար, պրոֆեսոր Ստեֆան Դանաիլովի շնորհավորական ուղերձն է
փոխանցել Հայաստանում Բուլղարիայի դեսպան Ստեֆան Վալեվ Դիմիտրովը
փետրվարի 28-ին ՀՀ մշակույթի եւ երիտասարդության հարցերի նախարար
Գեւորգ Գեւորգյանի հետ հանդիպմանը: Ուղերձում Բուլղարիայի
մշակույթի նախարարը պատրաստակամություն է հայտնում հետագայում եւս
շարունակել ավանդական համագործակցությունը:
ԻՆչպես «ՆՈՅՅԱՆ ՏԱՊԱՆ»-ին հայտնում են ՀՀ մշակույթի եւ
երիտասարդության հարցերի նախարարության մամուլի ծառայությունից,
հանդիպման մասնակիցներն արժեւորել են նախորդ եռամյա ծրագրի
ձեռքբերումները` հատուկ ուշադրության արժանացնելով Մարգարիտա
Թերզյանի հայերեն-բուլղարերեն, բուլղարերեն-հայերեն բառարանը,
Էդվարդ Գրիգորյանի խոսակցական բառարանը, Բուլղարիայի կերպարվեստի
ազգային ակադեմիայում Հայաստանի Ազգային պատկերասրահի
ցուցահանդեսը, Բուլղարիայի Սիմֆոնիկ նվագախմբի` Արամ Խաչատրյանի
գործերի կատարումները:
Քննարկվել են նաեւ մշակութային այն ոլորտները, որոնք
կընդգրկվեն առաջիկա երեք տարիների միջգերատեսչական գործնական
ծրագրում: Նշվել է, որ համագործակցության ավանդական դարձած
ուղղություններին կավելանան նաեւ օպերային արվեստն ու
թատերարվեստը: