ՆՈՐ ՈՒՍՈՒՄՆԱԿԱՆ ՏԱՐՈՒՄ ՀՊՃՀ-Ի ԱՌԱՋԻՆ ԿՈՒՐՍԵՐՈՒՄ ԿՍՈՎՈՐԵՆ
1537 ՈՒՍԱՆՈՂՆԵՐ
31-08-2005 16:00:00 | Հայաստան | Հասարակություն
ԵՐԵՎԱՆ, 31 ՕԳՈՍՏՈՍԻ, ՆՈՅՅԱՆ ՏԱՊԱՆ: Այս տարի Հայաստանի
պետական ճարտարագիտական համալսարան են ընդունվել 1537 ուսանողներ,
որոնց հետ ավանդական ողջույն-հանդիպումը կկայանա սեպտեմբերի 1-ին:
Ինչպես նշված է «ՆՈՅՅԱՆ ՏԱՊԱՆ»-ին տրամադրած հաղորդագրությունում,
հանդիպման ժամանակ նոր «պոլիտեխնիկցիներին» կողջունի ՀՊՃՀ ռեկտոր
Յուրի Սարգսյանը` շնորհավորելով նրանց ուսանող դառնալու
կապակցությամբ:
72 տարվա կենսագրություն ունեցող բուհը նոր ուսումնական տարին
դիմավորում է մի շարք նոր լաբորատորիաներով, լսարաններով, նորացված
համակարգչային տեխնիկայով, այլ տեխնիկական միջոցներով եւ
սարքավորումներով: Այս ուսումնական տարում ՀՊՃՀ-ում բացվել են մի
շարք նոր մասնագիտություններ եւ մասնագիտացումներ. առաջին
ընդունելությունն է կատարվել «Պոլիգրաֆիական արտադրության
տեխնոլոգիա» մասնագիտության գծով, Կիբեռնետիկայի դեպարտամենտում
բացվել է «Տեղեկատվական չափողական տեխնիկա եւ տեխնոլոգիա» նոր
տեխնոլոգիական մասնագիտությունը: Համալսարանի Վանաձորի
մասնաճյուղում բացվել են 2 նոր մասնագիտություններ: Ընդլայնվել է
մասնագիտությունների ցանկը նաեւ հեռակա ուսուցման եւ «Օտարերկրյա
քաղաքացիների ուսուցման» բաժանմունքներում: