ՍՈՒՆԴՈՒԿՅԱՆԻ ԱՆՎԱՆ ԹԱՏՐՈՆՈՒՄ ԿԿԱՅԱՆԱ ՍՓՅՈՒՌՔԱՀԱՅ ԴՐԱՄԱՏՈՒՐԳ
ԽՈՐԵՆ ԱՐԱՄՈՒՆԻԻ «ԱՆՎԵՐԱԴԱՐՁ ԱՊԱԳԱ» ՊԻԵՍԻ ՊՐԵՄԻԵՐԱՆ
23-06-2005 19:00:00 | Հայաստան | Մշակույթ
ԵՐԵՎԱՆ, 23 ՀՈՒՆԻՍԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ: Գաբրիել
Սունդուկյանի անվան Ազգային ակադեմիական թատրոնում հունիսի 24-ին
կկայանա սփյուռքահայ դրամատուրգ Խորեն Արամունիի «Անվերադարձ
ապագա» պիեսի պրեմիերան, որի բեմադրիչն է Լոս Անջելեսի Վարդան
Աճեմյանի անվան թատերախմբի ղեկավար Ժան Նշանյանը:
Ինչպես «ՆՈՅՅԱՆ ՏԱՊԱՆ»-ի թղթակցին հայտնեց Սունդուկյանի անվան
թատրոնի գեղարվեստական ղեկավար Վահե Շահվերդյանը, պիեսը խիստ
արդիական է եւ հրատապ իր թեմատիկայով. «Պիեսն այն մասին է, թե
ինչպես բազմաթիվ ընտանիքներ լքում են Հայաստանը` մեկնելով
մասնավորապես ԱՄՆ, եւ նրանց կյանքն ինչպես է դասավորվում այնտեղ:
Արդյոք երջանի՞կ են նրանք այնտեղ, եւ արդյոք հայը պե՞տք է մեկնի
Հայաստանից»:
Նշենք նաեւ, որ Ժան Նշանյանը արդեն 20 տարի է հիմնել եւ
ղեկավարում է Լոս Անջելեսի Վարդան Աճեմյանի անվան թատերախումբը:
Անվանի դերասանն ու ռեժիսորը այս տարիների ընթացքում բեմադրել է
բազմաթիվ ներկայացումներ եւ խաղացել կինոյում ու թատրոնում: