ԵՐԵՎԱՆԻ ԳԵՂԱՐՎԵՍՏԻ ԱԿԱԴԵՄԻԱՅԻ ՑՈՒՑԱՍՐԱՀՈՒՄ ՆԵՐԿԱՅԱՑՎԵՑԻՆ
ԲՈՒՀԻ ԻՐԱՆԱՀԱՅ ԵՎ ԻՐԱՆՑԻ ՈՒՍԱՆՈՂՆԵՐԻ ԱՇԽԱՏԱՆՔՆԵՐԸ
13-06-2005 18:27:00 | Հայաստան | Մշակույթ
ԵՐԵՎԱՆ, 13 ՀՈՒՆԻՍԻ, ՆՈՅՅԱՆ ՏԱՊԱՆ: Երեւանի Գեղարվեստի
պետական ակադեմիայի գրաֆիկայի, գեղանկարի եւ դիզայնի
ֆակուլտետներում սովորող իրանահայ եւ իրանցի 15 ուսանողների
գրաֆիկական, գեղանկարչական եւ վիմագրական չորս տասնյակից ավելի
աշխատանքների ցուցահանդեսը բացվեց հունիսի 13-ին ակադեմիայի
«Ալբերտ եւ Թովէ Բոյաջյան» ցուցասրահում:
Երեւանի Գեղարվեստի ակադեմիայի գրաֆիկայի ամբիոնի վարիչ
Անդրանիկ Կիլիկյանը հայտնեց, որ այսօր ակադեմիայում սովորում են 23
իրանցի եւ 50 իրանահայ ուսանողներ, իսկ նախապատրաստական կուրսում`
10 իրանցիներ եւ 15 իրանահայեր:
Ա. Կիլիկյանի խոսքերով, այս ուսանողների հետ մանրակրկիտ
աշխատանք է տարվում: «Այս ուսանողները նույնիսկ մատիտ բռնել չէին
կարողանում, բայց այսօր իրենց աշխատասիրության շնորհիվ կարողանում
են տիրապետել արվեստի գաղտնիքներին եւ հասնել պրոֆեսիոնալիզմի»,-
նշեց նա: Անդրանիկ Կիլիկյանի խոսքերով, Իրանում ծնված ուսանողներն
ունեն վառ երեւակայություն, որը շատ կարեւոր է արվեստագետի համար:
Գեղարվեստի ակադեմիայի դասախոսները հատկապես բարձր գնահատեցին
իրանահայ ուսանողներ Սիամանթո Մարիտրոսյանի, Մեղեդիի, Նինելի եւ
պարսկուհի Մոնա Մոբքիի աշխատանքները: