ԵՐԵՎԱՆՈՒՄ ԱՆՑԿԱՑՎԵԼԻՔ «ԵՍ ԵՄ» ՄԻՋԱԶԳԱՅԻՆ ԵՐԿՐՈՐԴ
ԵՐԻՏԱՍԱՐԴԱԿԱՆ ԿԻՆՈՓԱՌԱՏՈՆԻՆ ԿՑՈՒՑԱԴՐՎԵՆ 100 ՖԻԼՄԵՐ ՏԱՐԲԵՐ
ԵՐԿՐՆԵՐԻՑ
29-04-2005 18:20:00 | Հայաստան | Մշակույթ
ԵՐԵՎԱՆ, 29 ԱՊՐԻԼԻ, ՆՈՅՅԱՆ ՏԱՊԱՆ: Երեւանում մայիսի 7-13-ը
կանցկացվի «Ես եմ» միջազգային երկրորդ երիտասարդական կինոփառատոնը,
որի ընթացքում կցուցադրվեն 100 կինոնկարներ աշխարհի տարբեր
երկրներից, այդ թվում Ռուսաստանից, Ֆրանսիայից, ԱՄՆ-ից,
Հունաստանից, Բուլղարիայից: Ինչպես «ՆՈՅՅԱՆ ՏԱՊԱՆ»-ի թղթակցին
հայտնեց փառատոնի տնօրեն-կոորդինատոր Նինա Օրդոյանը, ընդհանուր
առմամբ փառատոնի կազմկոմիտեն ստացել է 160 ֆիլմ, սակայն
կինոգետների հանձնաժողովը դրանցից ընտրել է 100-ը: Փառատոնին կարող
են մասնակցել մինչեւ 35 տարեկան երիտասարդ ստեղծագործողները` միայն
2004-2005 թթ. արտադրված ֆիլմերով եւ տեսահոլովակներով:
Փառատոնի մրցութային ծրագիրը կընթանա 10 անվանակարգերում`
լավագույն լիամետրաժ եւ վավերագրական ֆիլմերի, լավագույն
օպերատորական եւ ռեժիսորական աշխատանքի, լավագույն երաժշտական
աշխատանքի, լավագույն տեսահոլովակի, լավագույն ուսանողական եւ
լավագույն անիմացիոն ֆիլմերի, լավագույն գովազդային տեսահոլովակի
եւ լավագույն վիդեոարտ աշխատանքների համար: Փառատոնի ժյուրին
սահմանել է «Գրանպրի» եւ 10 այլ մրցանակներ տարբեր անվանակարգերի
համար:
«Ես եմ» կինոփառատոնի նախագահը Հայաստանի Կինեմատոգրաֆիստների
միության նախագահ, կինոռեժիսոր Ռուբեն Գեւորգյանցն է: Նա նաեւ
փառատոնի ժյուրիի նախագահն է: