ԵՐԵՎԱՆ, 14 ՀՈՒՆՎԱՐԻ, ՆՈՅՅԱՆ ՏԱՊԱՆ: Տիգրան Պետրոսյանի անվան Հայաստանի շախմատիստի կենտրոնական տանը (ՀՇԿՏ) ընթանում է պատանիների եւ աղջիկների բաց մրցաշար, որը նախաձեռնել եւ անցկացնում է «Չես» շախմատային ակադեմիան: Միաժամանակ ընթանում են 6 մրցաշարեր. 2-ում հանդես են գալիս աղջիկները, մյուս 4-ում` պատանիները: Հաղթողները կորոշվեն 5 տարիքային խմբերում: Շվեյցարական խաղակարգով, 9 տուրով անցկացվող մրցումների հաղթողները հայտնի կդառնան հունվարի 18-ին: Մրցումները բավականին մասսայական բնույթ են կրում. դրանց մասնակցում են Հայաստանի քաղաքների ու մարզերի 8-18 տարեկան 248 շախմատիստներ: Ինչպես «ՆՈՅՅԱՆ ՏԱՊԱՆ»-ի թղթակցին տեղեկացրեց «Չես» ակադեմիայի նախագահ, գրոսմայստեր Սմբատ Լպուտյանը, ակադեմիայի ձմեռային ուսումնամարզական հավաքի մասնակիցների կազմը որոշելիս հաշվի են առնվելու նաեւ այս մրցումների արդյունքները:

---