ԵՐԵՎԱՆ, 6 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Երեւանի կենտրոնում`
Ֆիզկուլտուրայի ինստիտուտի հարեւանությամբ բացվեց
Մարզատրամաբանական խաղերի ակումբ: Այստեղ բավականին հարմարավետ
պայմաններում կգործեն տարբեր մարզաձեւերի` շաշկու, ռենձյուի,
շոգիի, գոյի, օթելլոյի, խմբեր: Կանցկացվեն նաեւ տարբեր կարգի
մրցումներ: Ակումբի ղեկավար, շաշկու եւ գո մարզաձեւերի հայաստանյան
ֆեդերացիաների նախագահ Աշոտ Մարգարյանը նշեց, որ արդեն
պայմանավորվածություն է ձեռք բերվել միջազգային մի շարք
ֆեդերացիաների հետ Երեւանում այդ մարզաձեւերի խնդիրներին նվիրված
սեմինարներ անցկացնելու վերաբերյալ:
Նոր ակումբի բացումը նշանավորվեց նաեւ մրցումների անցկացմամբ:
Շաշկու պատանեկան մրցաշարի հաղթող դարձավ Տիգրան Հարությունյանը,
որը իրավունք ստացավ հանդես գալու Լեհաստանում կայանալիք աշխարհի
պատանեկան առաջնությունում: Առաջին անգամ անցկացվեց նաեւ օթելլո
մարզաձեւի Հայաստանի առաջնությունը, որի հաղթող դարձավ Արա
Ղազարյանը: