ՀԱՋՈՐԴ ՏԱՐԻ ՀԱՅ ՀԱՆԴԻՍԱՏԵՍԻՆ ԿՆԵՐԿԱՅԱՑՎԻ ԴԱՎԻԹ ՄԱԹԵՎՈՍՅԱՆԻ
«ԹՇՆԱՄԻՆԵՐ» ԿԱՐՃԱՄԵՏՐԱԺ ՖԻԼՄԸ
28-12-2005 18:15:00 | Հայաստան | Մշակույթ
ԵՐԵՎԱՆ, 28 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Ռեժիսոր Դավիթ
Մաթեւոսյանի «Թշնամիներ» կարճամետրաժ գեղարվեստական ֆիլմի
մոնտաժման աշխատանքները մոտենում են ավարտին. ֆիլմի պրեմիերան
կկայանա 2006 թ. գարնանը: Ռուս գրող Գարշինի համանուն պատմվածքի
հիման վրա նկարահանված ֆիլմում, ինչպես «ՆՈՅՅԱՆ ՏԱՊԱՆ»-ի թղթակցին
հայտնեց ռեժիսորը, բարձրացվում է «հաղթող-պարտվող» խնդիրը:
Ռեժիսորը ներկայացրել է Արցախյան պատերազմը, հայի եւ թուրքի
փոխհարաբերությունները, որոնք պատերազմի հանգամանքներում`
ատելության, թշնամանքի, ավերածության մթնոլորտում, հայտնվել են
կողք-կողքի: «Նրանք կանգնած են մահվան շեմին: Երբ այս կամ այն
պատերազմի ժամանակ հաշվարկվում է զոհերի քանակը, մոռանում ենք, որ
զոհերից յուրաքանչյուրը մարդ է` թե' յուրային, թե' թշնամի: Ահա այս
ֆիլմով փորձում ենք ցույց տալ, որ որեւէ պատերազմում երբեւէ չի
եղել եւ չկա հաղթող, որովհետեւ ցանկացած պատերազմ անհատի համար
անձնական խոր ողբերգություն է, քանի որ նա հարաբերվում է
անմարդկայինի, հակաբնականի եւ մահվան հետ»,- նշեց Դ. Մաթեւոսյանը:
Դավիթ Մաթեւոսյանը հուսով է, որ 26-րոպեանոց տեւողությամբ
ֆիլմն արձագանքներ կունենա:
Գլխավոր դերերում հանդես են եկել դերասաններ Աշոտ Ադամյանը եւ
Էդգար Մինասյանը:
Ֆիլմը նկարահանվել է Շվեյցարիայի կառավարության կողմից
մասնակի ֆինանսավորվող AVANTI ծրագրի շրջանակում, ցուցաբերվել է
նաեւ պետական աջակցություն: