ԴԵԿՏԵՄԲԵՐԻ 12-16-Ը ԿԻԵՎՈՒՄ ԱՆՑԿԱՑՎԱԾ «ԴԵԼՓՅԱՆ ԽԱՂԵՐԻՆ» ՀԱՅ
ԵՐԵԽԱՆԵՐՆ ԱՐԺԱՆԱՑԵԼ ԵՆ ՄԵԴԱԼՆԵՐԻ ԵՎ ԴԻՊԼՈՄՆԵՐԻ
21-12-2005 18:15:00 | Հայաստան | Մշակույթ
ԵՐԵՎԱՆ, 21 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ - ՀԱՅԵՐՆ ԱՅՍՕՐ:
Դեկտեմբերի 12-16-ը Կիեւում անցկացված Անկախ պետությունների
համագործակցության անդամ երկրների երրորդ երիտասարդական «Դելփյան
խաղերին» հայ երեխաները ցուցաբերել են ակտիվ մասնակցություն եւ
տարբեր անվանակարգերում արժանացել մեդալների: Ինչպես դեկտեմբերի
21-ի ասուլիսում հայտնեց ՀՀ մշակույթի եւ երիտասարդության հարցերի
փոխնախարար Արթուր Պողոսյանը, «Մնջախաղ» եւ «Պլակատ»
անվանակարգերում հայ երեխաներն արժանացել են ոսկե, «Նվագախմբային
աղեղնային գործիք», «Ժողովրդական պար» եւ «Ակադեմիական երգ»
անվանակարգերում` արծաթե եւ երկու բրոնզե մեդալների, իսկ եւս վեց
անվանակարգերում` դիպլոմների:
Ա. Պողոսյանը նշեց, որ ամենաշատ մրցանակներ ստացել են
Ռուսաստանի եւ Ուկրաինայի ներկայացուցիչները, քանի որ նրանք գրեթե
բոլոր անվանակարգերում ներկայացրել են 3-4 կատարողի, իսկ
ուկրաինացիները հանդես են եկել հատկապես այն անվանակարգերում,
որտեղ «իրենք ավելի ուժեղ են»:
Նշվեց նաեւ, որ 2007 թ. «Դելփյան խաղերը» Հայաստանում
անցկացնելու առաջարկ է ստացվել, ինչը, ըստ Ա. Պողոսյանի, հավանաբար
կիրականացվի: