ԵՐԵՎԱՆ, 15 ՀՈՒՆՎԱՐԻ, ՆՈՅՅԱՆ ՏԱՊԱՆ: ՀՀ Առեւտրի եւ տնտեսական զարգացման նախարարության համակարգում գործող «Կենսատեխնոլոգիա» ԳՀԻ ՓԲ ընկերությունը ՆԱՏՕ-ի «Գիտությունը խաղաղության եւ անվտանգության համար» ծրագրի շրջանակներում մասնակցում է «Որպես սննդարդյունաբերական հավելում կաթնաթթվային բակտերիաների հակաբակտերիալ եւ հակաալերգիկ հատկությունների հետազոտություն» դրամաշնորհային ծրագրին, որտեղ ինստիտուտի գործընկերներ են Ռուսաստանի, Ֆրանսիայի, Բուլղարիայի, Եգիպտոսի եւ Ադրբեջանի նույն ոլորտի գիտօջախները: Այս մասին «ՆՈՅՅԱՆ ՏԱՊԱՆ»-ի թղթակցին հայտնեց «Կենսատեխնոլոգիա»-ի գիտական քարտուղար Գայանե Ավետիսովան: Նրա խոսքերով, 2006թ.-ի հոկտեմբերին մեկնարկած եռամյա դրամաշնորհային ծրագիրը «Կենսատեխնոլոգիա»-ին հնարավորություն է տալիս իրականացնել ինստիտուտում արդեն իսկ սինթեզվող համապատասխան հակաբակտերիալ պրեպարատի լրամշակումը` օգտագործելով ծրագրի շրջանակներում համագործակցող գիտօջախների տրամադրած տեղեկատվությունը: Պրեպարատի հիման վրա ինստիտուտում ստացվող հավելումները կիրառվում են Հայաստանի թռչնաբուծական եւ խոզաբուծական ձեռնարկություններում որպես հիվանդությունների կանխարգելիչ միջոց: Բացի դրանից, այդ հավելումներն օգտագործվում են նաեւ սննդարդյունաբերական ձեռնարկություններում` որպես կենսաբանական հիմքով կոնսերվանտ: «Կենսատեխնոլոգիա»-ի գիտքարտուղարը նաեւ նշեց, որ ծրագրի շրջանակներում կատարվում է երիտասարդ գիտնականների ուսուցում: Բուլղարիայում եւ Ֆրանսիայում, 2-3 ամիս տեւող դասընթացների ընթացքում, վերապատրաում են անցնում նաեւ 4 հայ ասպիրանտներ:

---