ՀՀ ՆԱԽԱԳԱՀԻ ՍԱՀՄԱՆԱԾ ՄՐՑԱՆԱԿՆԵՐԸ ՀԱՆՁՆՎԵՑԻՆ ԼԱՎԱԳՈՒՅՆ
ՄԱՐԶԱԿԱՆ ՀԱՄԱՅՆՔՆԵՐԻՆ ԵՎ ԲԱԿԵՐԻՆ
11-01-2008 19:45:00 | Հայաստան | Սպորտ
ԵՐԵՎԱՆ, 11 ՀՈՒՆՎԱՐԻ, ՆՈՅՅԱՆ ՏԱՊԱՆ: Հունվարի 11-ին ՀՀ Սպորտի
եւ երիտասարդության հարցերի նախարարությունում տեղի ունեցավ
լավագույն մարզական համայնքների եւ բակերի համար ՀՀ նախագահ Ռոբերտ
Քոչարյանի սահմանած մրցանակների հանձնման արարողությունը:
2007թ.-ին լավագույն քաղաքային մարզական համայնք է ճանաչվել
Արարատի մարզի Վեդի քաղաքը (քաղաքապետ Վարուժան Բարսեղյան): Հաջորդ
2 տեղերը զբաղեցրել են Սյունիքի մարզի Քաջարան քաղաքի (քաղաքապետ
Վարդան Գեւորգյան) եւ Երեւանի Ավան (թաղապետ Տարոն Մարգարյան)
համայնքները:
Լավագույն գյուղական մարզական համայնք է ճանաչվել Արմավիրի
մարզի Փարաքար գյուղը (գյուղապետ Սամվել Վարդանյան): Նրան հաջորդել
են Լոռու մարզի Գուգարք գյուղը (գյուղապետ Աշոտ Աշուղյան) եւ
Կոտայքի մարզի Գառնի գյուղը (գյուղապետ Աշոտ Վարդանյան):
«Լավագույն մարզական բակ» մրցանակին արժանացել է Շիրակի մարզի
Գյումրի քաղաքի (քաղաքապետ Վարդան Ղուկասյան) «Անուշիկ» բակը:
Երկրորդը Գեղարքունիքի մարզի Գավառ քաղաքի (քաղաքապետ Գուրգեն
Մարտիրոսյան) Հացառատ թաղամասի բակն է, երրորդը` Լոռու մարզի
Վանաձոր քաղաքի (քաղաքապետ Սամվել Դարբինյան) Տարոն-4 թաղամասի
«Կարմիր խաչ» բակը:
Մրցանակները հանձնեց սպորտի եւ երիտասարդության հարցերի
նախարար Արմեն Գրիգորյանը: