ԵՐԵՎԱՆ, 18 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Ֆուտբոլի Հայաստանի
ազգային հավաքականն անցկացրեց աշխարհի 2006թ.-ի առաջնության
ընտրական փուլի հերթական` 5-րդ, հանդիպումը: Նոյեմբերի 17-ին
Հայաստանի ընտրանին Երեւանի «Հանրապետական» մարզադաշտում ընդունեց
Ռումինիայի հավաքականին: Մրցախաղն ավարտվեց ոչ-ոքի` 1-1 հաշվով:
Առաջին խաղակեսում հաշիվը բացեց ռումինացի հարձակվող Չիպրիան
Մարիկան, իսկ երկրորդում Հայաստանի հավաքականի պաշտպան Կարեն
Դոխոյանը հավասարեցրեց այն: Սա Հայաստանի հավաքականի 1-ին ոչ-ոքին
եւ 1-ին միավորն է. նախորդ բոլոր 4 հանդիպումներում թիմը
պարտություններ է կրել: Աշխարհի առաջնության ընտրական փուլի հաջորդ
խաղը Հայաստանի հավաքականը կանցկացնի 2005թ. մարտի 26-ին: Այդ օրը
նա կընդունի Անդորրայի թիմին:
Եվրոպական 1-ին խմբում, որտեղ ընդգրկված է Հայաստանի
հավաքականը, անցկացվեցին եւս 2 հանդիպումներ. Անդորրա - Հոլանդիա`
0-3, Մակեդոնիա-Չեխիա` 0-2: Այժմ մրցաշարային իրավիճակն այսպիսին
է. Հոլանդիա` 10 միավոր (4 խաղից հետո), Ռումինիա` 10 (5), Չեխիա`
9 (4), Ֆինլանդիա` 9 (5), Մակեդոնիա` 4 (5), Անդորրա` 3 (4),
Հայաստան` 1 միավոր (5):
Հայաստանի երիտասարդական հավաքականը Եվրոպայի առաջնության
ընտրական խաղ անցկացրեց Ռումինիայի հավաքականի հետ եւ պարտություն
կրեց 0-5 հաշվով: Հայաստանի երիտասարդական թիմը նույնպես
եզրափակում է մրցաշարային աղյուսակը. նա 3 միավոր ունի (1
հաղթանակ եւ 4 պարտություն):