ՆՈՅԵՄԲԵՐԻ 19-ԻՆ ԵՐԵՎԱՆՈՒՄ ԿՄԵԿՆԱՐԿԻ ՏԻԳՐԱՆ ՊԵՏՐՈՍՅԱՆԻ
75-ԱՄՅԱԿԻՆ ՆՎԻՐՎԱԾ ՄԻՋԱԶԳԱՅԻՆ ՄՐՑԱՇԱՐԸ
18-11-2004 18:35:00 | Հայաստան | Սպորտ
ԵՐԵՎԱՆ, 18 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 19-ին
կմեկնարկի աշխարհի 9-րդ չեմպիոն Տիգրան Պետրոսյանի 75-ամյակին
նվիրված հուշամրցաշարը: Այն կանցկացվի Հայաստանի շախմատիստի
կենտրոնական տանը (ՀՇԿՏ), շվեյցարական խաղակարգով, 9 մրցափուլով եւ
կավարտվի նոյեմբերի 27-ին: Սպասվում է որ միջազգային մրցաշարում
հանդես կգան տարբեր երկրների շուրջ 140 շախմատիստներ: Ընդհանուր
մրցանակային հիմնադրամը 35 հազար ԱՄՆ դոլար է: Կպարգեւատրվեն
մինչեւ 30-րդ տեղեր գրաված մասնակիցները, ինչպես նաեւ` կին եւ
պատանի շախմատիստներից 3-ական լավագույն արդյունքներ ցույց
տվողները: Մրցաշարի հաղթողը կստանա 5 հազար դոլար:
Բաց մրցաշարի ավարտից անմիջապես հետո` նոյեմբերի 28-29-ին,
ՀՇԿՏ-ում կանցկացվի արագ շախմատի Եվրոպայի առաջնությունը, որը
նույնպես նվիրված է ականավոր շախմատիստի հոբելյանին: