ՀԱՅԱՍՏԱՆԻ ՇԱԽՄԱՏԻՍՏՆԵՐԸ ՀԱՄԱՇԽԱՐՀԱՅԻՆ ՕԼԻՄՊԻԱԴԱՅՈՒՄ
ԲԱԺԱՆՈՒՄ ԵՆ 2-3-ՐԴ ՏԵՂԵՐԸ
29-10-2004 16:15:00 | Հայաստան | Սպորտ
ԵՐԵՎԱՆ, 29 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Իսպանիայի Մալյորկա
կղզու Կալվիա քաղաքում ընթացող շախմատի 36-րդ համաշխարհային
օլիմպիադան մոտեցել է ավարտին. թե' տղամարդկանց, թե' կանանց
մրցաշարերում մնացել է անցկացնել ընդամենը 2 մրցափուլ:
Հերթական 12-րդ մրցափուլում Հայաստանի տղամարդկանց հավաքականը
2-2 հաշվով ավարտեց հանդիպումը ԱՄՆ-ի թիմի հետ: Վլադիմիր Հակոբյանը
եւ Ռաֆայել Վահանյանը ոչ-ոքի խաղացին իրենց մրցակիցների հետ, Լեւոն
Արոնյանը հաղթանակ տարավ, իսկ Սմբատ Լպուտյանը պարտություն կրեց:
Այժմ, վաստակելով 31 միավոր, Հայաստանի հավաքականը Ռուսաստանի
հավաքականի հետ բաժանում է 2-3-րդ տեղերը: Մրցապայքարը գլխավորում
է Ուկրաինայի թիմը, որը 34,5 միավոր ունի:
Հայաստանի կանանց հավաքականը 12-րդ մրցափուլում անհաջողության
մատնվեց. թիմը 0,5-2,5 հաշվով զիջեց Սլովակիայի հավաքականին: Լիլիթ
Մկրտչյանը ոչ-ոքի խաղաց, իսկ Էլինա Դանիելյանն ու Նելլի Աղինյանը
պարտվեցին: Հայաստանի շախմատիստուհիները զգալիորեն վատացրին իրենց
գործերը. նրանք այժմ 20 միավորով տեղ են զբաղեցնում մրցաշարային
աղյուսակի 3-րդ տասնյակում: Առջեւում չինուհիներն են, որոնք 27
միավոր ունեն:
Հերթական` 13-րդ, մրցափուլում Հայաստանի տղամարդիկ կմրցեն
Ֆրանսիայի, կանայք` Մոլդովայի շախմատիստների հետ: