ԵՐԵՎԱՆ, 25 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Իսպանական Մալյորկայի
Կալվիա քաղաքում ընթացող շախմատի 36-րդ համաշխարային օլիմպիադայում
հաջող են հանդես գալիս Հայաստանի տղամարդկանց ու կանանց
հավաքականները:
9 մրցափուլից հետո Հայաստանի տղամարդկանց հավաքականը վաստակել
է 23 միավոր եւ Իսրայելի թիմի հետ բաժանում է 4-5-րդ տեղերը:
Առջեւում են Ուկրաինայի (27 միավոր), Ռուսաստանի (24,5) եւ ԱՄՆ-ի
(24) հավաքականները:
Հայաստանի կանանց հավաքականը եւս 4 թիմերի հետ 16,5 միավորով
բաժանում է 8-12-րդ տեղերը: Սակայն հայ շախմատիստուհիները կարող են
բարելավել այս արդյունքը, քանի որ ընդամենը 1 միավորով են ետ մնում
2-4-րդ տեղերը զբաղեցնող Ռուսաստանի, ԱՄՆ-Ի եւ Հնդկաստանի
թիմերից: Այստեղ մրցապայքարը գլխավորում է Չինաստանի ընտրանին, որը
շատ առաջ է անցել հետապնդողներից. չինուհիներն ունեն 23,5 միավոր:
Հոկտեմբերի 25-ին կայանալիք 10-րդ մրցափուլում Հայաստանի
տղամարդիկ կմրցեն Սլովենիայի, իսկ կանայք` Լեհաստանի շախմատիստների
հետ: Օլիմպիադային մնացել է 5 մրցափուլ: