ՀԱՅԱՍՏԱՆԻ ՇԱԽՄԱՏԻՍՏՆԵՐԸ ՀԱՋՈՂ ԵՆ ՄԵԿՆԱՐԿԵԼ 36-ՐԴ
ՀԱՄԱՇԽԱՐՀԱՅԻՆ ՕԼԻՄՊԻԱԴԱՅՈՒՄ
20-10-2004 10:50:00 | Հայաստան | Սպորտ
ԵՐԵՎԱՆ, 20 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Չորս մրցափուլ է
անցկացվել Իսպանիայի Մալյորկա կղզում գտնվող Կալվիա քաղաքում
անցկացվող շախմատի 36-րդ համաշխարհային օլիմպիադայում:
Հայաստանի տղամարդկանց հավաքականը հաջող է մեկնարկել: Հայ
շախմատիստները հերթով հաղթել են Մոնղոլիայի (3,5-0,.5),
Ուզբեկստանի (3-1), Էստոնիայի (3-1) հավաքականներին,
Բոսնիյա-Հերցեգովինայի շախմատիստների հետ հանդիպում ավարտել
ոչ-ոքիով (2-2) եւ վաստակելով են 11,5 միավոր բաժանում են 6-10-րդ
տեղերը: Տղամարդկանց մրցաշարում առաջատարը Ուկրաինայի հավաքականն
է, որը 14,5 միավոր է վաստակել: Նրանից կես միավորով է ետ մնում
2-րդ տեղում ընթացող Իսրայելի հավաքականը:
Հայաստանի կանանց հավաքականը փոքր-ինչ անհաջող սկսեց
մրցաշարը: 1-ին մրցափուլում թիմը անսպասելիորեն պարտություն կրեց
Մալայզիայի հավաքականից (1-2), բայց հետո հաղթեց Գվատեմալայի
(3-0), Իսպանիա-II (2-1) հավաքականներին եւ ոչ-ոքի (1,5-1,5) խաղաց
Շվեյցարիայի թիմի հետ: Հայաստանի շախմատիստուհիներն այժմ ունեն 7,5
միավոր եւ բավականին ետ են մնում առաջատարներից:
Հիմնական պայքարն առջեւում է: Թե' տղամարդկանց, թե' կանանց
մրցաշարերում կանցկացվի եւս 10 մրցափուլ: