ՀԱՅԱՍՏԱՆԻ ՊԱՏԱՆԻ ՖՈՒՏԲՈԼԻՍՏՆԵՐԸ ՀԱՋՈՂՈՒԹՅԱՄԲ ՀԱՂԹԱՀԱՐԵՑԻՆ
ԵՎՐՈՊԱՅԻ ԱՌԱՋՆՈՒԹՅԱՆ ԱՌԱՋԻՆ ԸՆՏՐԱԿԱՆ ՓՈՒԼԸ
05-10-2004 19:10:00 | Հայաստան | Սպորտ
ԵՐԵՎԱՆ, 5 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ավարտվեց Մակեդոնիայում
ընթացող մինչեւ 19 տարեկան ֆուտբոլիստների 2004-05թթ.-ի Եվրոպայի
առաջնության 1-ին ընտրական փուլի մրցաշարը, որտեղ հանդես էր գալիս
Հայաստանի հավաքականը: Մրցաշարում Հայաստանի պատանի ֆուտբոլիստները
պարտվեցին ֆրանսիացիներին (1-2), հաղթեցին մակեդոնացիներին (2-1),
ոչ-ոքի (1-1) ավարտեցին հանդիպումը ադրբեջանցիների հետ եւ,
վաստակելով 4 միավոր, խմբում գրավեցին 2-րդ տեղը: Հայաստանի
հավաքականը, 1-ին տեղը 9 միավորով գրաված Ֆրանսիայի հավաքականի հետ
միասին, իրավունք ստացավ մասնակցելու Եվրոպայի առաջնության 2-րդ
ընտրական փուլին, որը կանցկացվի 2005թ.-ի գարնանը: Այս մրցաշարում
միայն 1-ին տեղը գրավող թիմին իրավունք կտրվի հանդես գալու
եզրափակիչ փուլում:
Էստոնիայում նմանօրինակ մրցաշարի մասնակցեցին նաեւ Հայաստանի
մինչեւ 19 տարեկան աղջիկները: Նրանք 2 պարտություն կրեցին`
Իտալիայի (0-9) եւ Շվեդիայի (0-11) հավաքականներից, իսկ վերջին
խաղում հաղթեցին Էստոնիայի հավաքականին (2-1) եւ գրավեցին 3-րդ
տեղը: 1-ին փուլի բոլոր մրցաշարերի ավարտից հետո միայն հայտնի
կդառնա` Հայաստանի թիմը կշարունակի՞ պայքարը, թե՞ ոչ: Առայժմ 2-րդ
ընտրական փուլում հանդես գալու իրավունք նվաճել են Իտալիայի եւ
Շվեդիայի հավաքականները: