ԿԱՅԱՑԱՎ «ԱՐՑԱԽ» ՎԱՎԵՐԱԳՐԱԿԱՆ ՖԻԼՄԻ ՀԱՅԱՍՏԱՆՅԱՆ ՊՐԵՄԻԵՐԱՆ
14-09-2004 19:00:00 | Հայաստան | Մշակույթ
ԵՐԵՎԱՆ, 14 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի Ազգային
գրադարանում (ՀԱԳ) սեպտեմբերի 14-ին կայացավ նյույորքաբնակ լրագրող
Զվարթ Գալստյան-Գեւորգյանի սցենարով նկարահանած «Արցախ»
վավերագրական ֆիլմի հայաստանյան պրեմիերան: 1988թ.-ին նկարահանած
ֆիլմում, որը, ըստ Զ.Գալստյան-Գեւորգյանի, մինչ այդ ցուցադրվել է
աշխարհի բազմաթիվ երկրներում, ներկայացված է հայ ժողովրդի ազգային
զարթոնքի եւ Ղարաբաղի անկախության համար պայքարի սկիզբը:
Սցենարի հեղինակը հայտնեց, որ ֆիլմը նկարահանվել է լուսահոգի
Մեսրոպ արքեպիսկոպոս Աշճյանի նախաձեռնությամբ, որը տրամադրել էր
իրեն Հայաստանում 88-ի փետրվարյան իրադարձությունների մասին պատմող
որոշ տեսաժապավեններ: Այնուհետեւ արքեպիսկոպոսը առաջարկել է
միավորել այդ բոլոր երիզները, գրել սցենար եւ ֆիլմ պատրաստել:
Զ.Գալստյան-Գեւորգյանի խոսքերով, արքեպիսկոպոս Աշճյանի նպատակն էր
աշխարհին ներկայացնել ղարաբաղյան շարժման իրական պատկերը` առանց
խեղաթյուրման: «Ես պետք է համարձակ բաներ գրեի, ինչը դժվար էր,
սակայն ես հայ եմ, եւ կատարել եմ իմ սրբազան պարտքը»,- նշեց նա:
Նշվեց նաեւ, որ ֆիլմը անգլերեն թարգմանել է բանաստեղծ Գեւորգ
Էմինի քրոջ որդին` Արա Գաբրիելյանը: Ըստ Զ.Գալստյան-Գեւորգյանի,
ամերիկյան մամուլում բազմիցս գրվել է ֆիլմի մասին, իսկ շատ
ամերիկացիներ «Արցախ» ֆիլմով են ճանաչել հայ ժողովրդին: