ՖՈՒՏԲՈԼԻ ՀԱՅԱՍՏԱՆԻ ՀԱՎԱՔԱԿԱՆՆԵՐԸ ԵՐԿՐՈՐԴ ՀԱՆԴԻՊՈՒՄՆԵՐՈՒՄ ԷԼ
ՊԱՐՏՈՒԹՅՈՒՆ ԿՐԵՑԻՆ
09-09-2004 16:50:00 | Հայաստան | Սպորտ
ԵՐԵՎԱՆ, 9 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Աշխարհի առաջնության
ընտրական մրցաշարի իր 2-րդ խաղն անցկացրեց ֆուտբոլի Հայաստանի
ազգային հավաքականը: Երկրի ընտրանին Երեւանի «Հանրապետական»
մարզադաշտում սեպտեմբերի 8-ին հյուրընկալեց Ֆինլանդիայի
հավաքականին: Հյուրերն ավելի ուժեղ գտնվեցին. նրանց թիմի
խաղացողներ Միաքյել Ֆուրսելը եւ Ալեքսեյ Երյոմենկոն գրավեցին
Հայաստանի հավաքականի դարպասը, եւ Ֆինլանդիայի հավաքականը հաղթեց
2-0 հաշվով: Այսպիսով, Հայաստանի ազգային թիմը 2-րդ պարտությունը
կրեց ընտրական մրցաշարում:
Աշխարհի առաջնության եվրոպական առաջին ընտրական խմբում, որտեղ
ընդգրկված է Հայաստանի հավաքականը, սեպտեմբերի 8-ին եւս 2 խաղ
կայացավ: Ահա դրանց արդյունքները. Հոլանդիա-Չեխիա` 2-0,
Անդորրա-Ռումինիա` 1-5: Խմբում առաջատարաը Ռումինիայի հավաքականն
է, որը հաղթել է բոլոր 3 խաղերում եւ ունի 9 միավոր:
2-րդ անգամ անհաջողության մատնվեց նաեւ Հայաստանի
երիտասարդական հավաքականը: Եվրոպայի առաջնության շրջանակներում
մրցելով Ֆինլանդիայի երիտասարդների հետ, նա պարտություն կրեց 0-1
հաշվով: