ԵՐԵՎԱՆ, 7 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Սեպտեմբերի 8-ի
ասուլիսում Հայաստանի ազգային օլիմպիական կոմիտեի եւ Սպորտի
պետական կոմիտեի նախագահ Իշխան Զաքարյանը լրագրողներին խնդրեց
չքաղաքականացնել հարցը եւ շահարկումների առարկա չդարձնել Աթենքի
28-րդ օլիմպիադայում Հայաստանի մարզիկների անհաջող ելույթների
թեման: Նա նշեց, որ օլիմպիադային նախորդող 4 տարիների ընթացքում
ամեն ինչ արվել է Աթենքի խաղերին լավ նախապատրաստվելու համար: Ըստ
նրա, մարզաձեւերի ֆեդերացիաների նախագահների, հավաքականների
մարզիչների բոլոր պահանջներն ու խնդրանքները բավարարվել են:
Սակայն, ինչպես նշեց Ի.Զաքարյանը, Աթենքում որոշ մարզիկների հետ
անհասկանալի բան կատարվեց եւ նրանք իրենց հնարավորություններից
ցածր հանդես եկան: ՀԱՕԿ-ի նախագահի խոսքերով, իր դերը խաղաց նաեւ
այն, որ այժմ բարձր կարգի մրցումներում (իսկ օլիմպիական խաղերն
հենց այդպիսին են) չի պահպանվում ազնիվ մրցակցության ոգին, այլ
գործոններ են հանդես գալիս:
Ի.Զաքարյանը տեղեկացրեց, որ ինքը պատրաստվում է մարզաձեւերի
հանրապետական ֆեդերացիաների նախագահների, մասնագետների հետ լուրջ
քննարկումներ անցկացնել, պարզել անհաջողությունների պատճառները:
ՀԱՕԿ-ի նախագահը խիստ կարեւորեց մարզաձեւերի հանրապետական
ֆեդերացիաների ինտեգրումը միջազգային կառույցներին: Այս կերպ, ըստ
նրա, հնարավոր է շատ եւ շատ հարցեր լուծել, հակառակ դեպքում կրկին
կհայտնվենք աննպաստ վիճակներում:
Անդրադառնալով շատերին հետաքրքրող այն հարցին, թե արդյոք ինքը
չի՞ պատրաստվում հրաժարական տալ, Ի.Զաքարյանը բացասական պատասխան
տվեց: Ըստ իրեն, ինքն իրենից կախված ամեն ինչ արել է Աթենքի
օլիմպիադային լավագույնս նախապատրաստվելու եւ այնտեղ հաջող հանդես
գալու համար: