ՄԻՍԱԿ ՀԱԽՈՅԱՆԸ ՊԱՀՊԱՆԵՑ ՀԱՅԱՍՏԱՆԻ ՉԵՄՊԻՈՆԻ ԿՈՉՈՒՄԸ
23-08-2004 16:50:00 | Հայաստան | Սպորտ
ԵՐԵՎԱՆ, 23 ՕԳՈՍՏՈՍԻ, ՆՈՅՅԱՆ ՏԱՊԱՆ: Հայաստանի բիլիարդի
ֆեդերացիայի ակումբում անցկացվեց «ռուսական բուրգ» խաղաձեւի
հանրապետական առաջնությունը, որին մասնակցեցին տարբեր մարզերի ու
քաղաքների 37 ներկայացուցիչներ:
Մրցաշարն ընթացավ կիսաօլիմպիական մրցակարգով. 2 պարտություն
կրող մասնակիցը դուրս էր մնում մրցապայքարից: Եզրափակիչում
Հայաստանի բազմակի չեմպիոն, սպորտի վարպետ Միսակ Հախոյանը (Երեւան)
պարտության մատնելով Տիգրան Ղազարյանին (Գյումրի) կրկին նվաճեց
երկրի չեմպիոնի կոչումը: 3-րդ մրցանակակիր դարձավ Արմեն
Միքայելյանը (Երեւան):
Նշենք, որ Հայաստանի 6 ներկայացուցիչներ սեպտեմբեր ամսին
հանդես կգան Թբիլիսիում անցկացվելիք «Կովկասի գավաթ» անունը կրող
բիլիարդի միջազգային մրցաշարում: