ԲՌՆՑՔԱՄԱՐՏԻԿ ԱԼԵՔՍԱՆ ՆԱԼԲԱՆԴՅԱՆԸ ՀԱՎԱԿՆՈՒՄ Է ՕԼԻՄՊԻԱԿԱՆ
ՄԵԴԱԼԻ
23-08-2004 16:48:00 | Հունաստան | Սպորտ
ԱԹԵՆՔ, 23 ՕԳՈՍՏՈՍԻ, ՆՈՅՅԱՆ ՏԱՊԱՆ: Աթենքում անցկացվող 28-րդ
ամառային օլիմպիական խաղերում Հայաստանի ներկայացուցիչներն առայժմ
ոչ մի մեդալ չեն նվաճել:
85 կգ քաշային կարգում հանդես եկող ծանրորդ Տիգրան
Մարտիրոսյանը, ցույց տալով 367,5 կգ արդյունք (պոկում` 167,5 կգ,
հրում` 200 կգ), գրավեց 7-րդ տեղը: Այս քաշային կարգում 382,5 կգ
արդյունքով օլիմպիական չեմպիոն դարձավ Գեորգի Ասանիձեն (Վրաստան):
Անհաջող հանդես եկան Հայաստանի 2 թեթեւ ատլետները: Եռացատկում
Արմեն Մարտիրոսյանը 15 մ 5 սմ արդյունքով գրավեց վերջին` 43-րդ
տեղը, իսկ արագավազորդուհի Մարինե Ղազարյանը, 100 մ
մրցատարածությունն անցնելով 12,29 վայրկյանում, 63 մասնակիցների
մեջ գրավեց 50-րդ տեղը:
Հաջող մենամարտեց հայաստանցի բռնցքամարտիկ Ալեքսան
Նալբանդյանը (48 կգ քաշային կարգ): Նա 2-րդ շրջանում վստահորեն
հաղթեց Իրաքի ներկայացուցիչ Ալի Նաջահին եւ քառորդ եզրափակիչում
մրցելու է չին բռնցքամարտիկի հետ:
Օգոստոսի 24-ից մրցապայքարը կսկսեն ըմբիշները, եւ Հայաստանի 7
ներկայացուցիչները, կարող են իրական պայքար մղել օլիմպիական
մեդալների համար: