ՏԻԳՐԱՆ ՊԵՏՐՈՍՅԱՆԻ 75-ԱՄՅԱԿԻՆ ՆՎԻՐՎԱԾ ՄԻՋՈՑԱՌՈՒՄՆԵՐԻ
ՇՐՋԱՆԱԿՈՒՄ ՄՈՍԿՎԱՅՈՒՄ ԿԱՆՑԿԱՑՎԻ ՊԵՏՐՈՍՅԱՆԱԿԱՆՆԵՐԻ ԵՎ ԱՇԽԱՐՀԻ
ՀԱՎԱՔԱԿԱՆՆԵՐԻ ՀԱՆԴԻՊՈՒՄԸ
08-06-2004 19:40:00 | Հայաստան | Սպորտ
ԵՐԵՎԱՆ, 8 ՀՈՒՆԻՍԻ, ՆՈՅՅԱՆ ՏԱՊԱՆ: Հայ մեծ շախմատիստ, աշխարհի
9-րդ չեմպիոն Տիգրան Պետրոսյանի 75-ամյակին նվիրված միջոցառումների
շրջանակում հունիսի 9-15-ը Մոսկվայում պետրոսյանական թիմը կմրցի
աշխարհի հավաքականի հետ: Ըստ Հայաստանի շախմատային ֆեդերացիայի
հաղորդագրության, պետրոսյանականների թիմը կգլխավորի աշխարհի
ուժեղագույն շախմատիստ Գարրի Կասպարովը: Թիմում ընդգրկված են
Վլադիմիր Հակոբյանը, Ռաֆայել Վահանյանը, Սմբատ Լպուտյանը, ինչպես
նաեւ Պետեր Լեկոն եւ Բորիս Գելֆանդը: Աշխարհի հավաքականի կազմում
հանդես կգան Վիշվանաթան Անանդը, Պյոտր Սվիդլերը, Մայքլ Ադամսը,
Էթիեն Բաքրոն, Ֆրանսիսկո Վալեխո Պոնսը եւ Լուկ Վան Վելին:
Այս տարվա նոյեմբերին Տիգրան Պետրոսյանին նվիրված 2 խոշոր
մրցաշարեր` միջազգային բաց մրցաշար եւ Եվրոպայի արագ շախմատի
առաջնություն, կանցկացվի Երեւանում: Իսկ դեկտեմբերին նախատեսվում է
ինտերնետ համացանցի միջոցով Տ.Պետրոսյանի միջազգային հուշամրցաշար
անցկացնել Հայաստանի, Ռուսաստանի, Չինաստանի եւ Հնդկաստանի
հավաքականների մասնակցությամբ:
2004թ.-ին, որը Հայաստանի շախմատային ֆեդերացիայի
առաջարկությամբ ՖԻԴԵ-ն ամբողջ աշխարհում հռչակել է Տիգրան
Պետրոսյանի տարի, Ապարան քաղաքի կենտրոնական հրապարակը կկոչվի նրա
անունով. մինչեւ տարեվերջ այստեղ նախատեսվում է տեղադրել
Տ.Պետրոսյանի հուշարձանը: Աշխարհի 9-րդ չեմպիոնի եւս մեկ հուշարձան
կկանգնեցվի Երեւանի Դավիթաշեն թաղամասում:
Շախմատիստի 75-ամյա հոբելյանը նշանավորվել է երկու`
ակադեմիկոս Գեւորգ Բրուտյանի «Տիգրան Պետրոսյանը իմ հուշաշխարհում»
եւ Գագիկ Հովհաննիսյանի «Տիգրան Պետրոսյանը լուսանկարներում,
գրոհներում, ասույթներում» գրքերի լույս ընծայմամբ: Վերջինս
հրատարակվել է հայերեն եւ անգլերեն լեզուներով: Հոբելյանի
կապակցությամբ Հայաստանի ազգային գրադարանը պատրաստել է Տիգրան
Պետրոսյանին նվիրված հրատարակությունների ցուցահանդես: Շուտով
կթողարկվի հոբելյանական նամականիշ, իսկ հունիսին եւ նոյեմբերին,
համապատասխանաբար, Մոսկվայում եւ Երեւանում կկայանան հանդիսավոր
նիստեր: