ՇԱԽՄԱՏԻ ԱՇԽԱՐՀԻ ԱՌԱՋՆՈՒԹՅՈՒՆՆԵՐԸ ԿԱՆՑԿԱՑՎԵՆ ՏՐԻՊՈԼԻՈՒՄ ԵՎ
ԷԼԻՍՏԱՅՈՒՄ
03-05-2004 18:00:00 | Հայաստան | Սպորտ
ԵՐԵՎԱՆ, 3 ՄԱՅԻՍԻ, ՆՈՅՅԱՆ ՏԱՊԱՆ: Շախմատի միջազգային
ֆեդերացիան (ՖԻԴԵ) հրապարակել է աշխարհի առաջնության մասնակիցների
ցուցակը:
Լիբիայի մայրաքաղաք Տրիպոլիում կայանալիք առաջնությունում
հանդես կգան 128 շախմատիստներ: Նրանց թվում կլինեն Հայաստանի 6
ներկայացուցիչներ` գրոսմայստերներ Վլադիմիր Հակոբյանը, Ռաֆայել
Վահանյանը, Սմբատ Լպուտյանը, Գաբրիել Սարգսյանը, Աշոտ Անաստասյանը
եւ Կարեն Ասրյանը: Առաջնության մասնակիցների թվում կլինեն եւս 2
հայազգի շախմատիստներ` Գերմանիան ներկայացնող Լեւոն Արոնյանը եւ
Սլովակիան ներկայացնող Սերգեյ Մովսիսյանը:
Աշխարհի առաջնությունը կանցկացվի հունիս-հուլիս ամիսներին:
«Նոկաուտ» համակարգով անցկացվելիք մրցումների մրցանակային
հիմնադրամը ավելի քան 1,5 միլիոն դոլար է: Ընդ որում, դրամական
պարգեւներ կստանան բոլոր մասնակիցները:
Հստակություն մտցվեց աշխարհի կանանց առաջնության մրցավայրի
հարցում: ՖԻԴԵ-ի նախագահ Կիրսան Իլյումժինովի եւ Աջարիայի նախագահ
Ասլան Աբաշիձեի միջեւ պայմանագիր էր կնքվել առաջնությունը
Բաթումում անցկացնելու վերաբերյալ: Սակայն, քանի որ Վրաստանի
իշխանություններն իրենց անհամաձայնությունն էին հայտնել, մրցավայրը
փոխվեց. կանանց առաջնությունը կանցկացվի Իլյումժինովի հայրենի
Կալմիկիայի մայրաքաղաք Էլիստայում: Մրցաշարի մեկնարկը նախապես
նշանակված էր մայիսի 21-ին, սակայն այն կարող է փոխվել: Թեեւ
առաջնությունը Բաթումում չի կայանա, այդուհանդերձ, ծախսերը կհոգա
Աջարիայի կառավարությունը, իսկ աշխարհի չեմպիոնուհուն կհանձնվի
Ասլան Աբաշիձեի գավաթը:
Կանանց առաջնությունը նույնպես կընթանա «Նոկաուտ» համակարգով:
Աշխարհի առաջնության 64 մասնակիցների թվում կլինեն Հայաստանի 2
ուժեղագույն շախմատիստուհիներ` գրոսմայստերներ Էլինա Դանիելյանը եւ
Լիլիթ Մկրտչյանը: