ԵՐԵՎԱՆ, 8 ԱՊՐԻԼԻ, ՆՈՅՅԱՆ ՏԱՊԱՆ: Ապրիլի 8-ին
«Լեռնագործ-Արարատ» (Կապան) - «Փյունիկ» (Երեւան) եւ «Բանանց»
(Երեւան) - «Շիրակ» (Գյումրի) հանդիպումներով մեկնարկեց ֆուտբոլի
Հայաստանի 13-րդ առաջնությունը:
Մեկ տարվա որակազրկումից հետո առաջնություն վերադարձած
«Արարատի» եւ երկրի չեմպիոն «Փյունիկի» հանդիպման 2 խաղակեսերը
խիստ տարբեր էին իրարից: Արարատցիները համարձակորեն մտան պայքարի
մեջ եւ սկզբում համարյա հավասար խաղ վարեցին ուժեղ մրցակցի դեմ:
Հենց իրենք էլ բացեցին հաշիվը: Սակայն «Փյունիկի» ֆուտբոլիստները
1-ին խաղակեսի վերջում խփեցին պատասխան գոլը` 1-1: 2-րդ խաղակեսում
չեմպիոնի առավելությունն ակնհայտ էր: Փյունիկցիներն ընդամենը 7
րոպեի ընթացքում եւս 3 անգամ գրավեցին մրցակցի դարպասը եւ հաղթեցին
4-1 հաշվով:
Հավասար մրցակցություն ծավալվեց «Բանանց» - «Շիրակ» հանդիպման
ժամանակ: 2 թիմերի ֆուտբոլիստները 1-ին խաղակեսում 1-ական անգամ
գրավեցին դարպասները եւ ինչքան էլ 2-րդ խաղակեսում փորձեցին
հաղթանակ կորզել, չհաջողվեց: Խաղն այդպես էլ ավարտվեց 1-1 հաշվով:
Ապրիլի 9-ին կանցկացվեն 1-ին մրցափուլի մյուս 2 խաղերը:
Կմրցեն «Կոտայք» (Աբովյան) - «Դինամո-Զենիթ» (Երեւան) եւ «Միկա»
(Աշտարակ) - «Կիլիկիա» (Երեւան) զույգերը: