ՆՈՐԱՅՐ ԲԱԽՏԱՄՅԱՆԸ ՆԱԽԱՊԱՏՐԱՍՏՎՈՒՄ Է ԱԹԵՆՔԻ ՕԼԻՄՊԻԱԿԱՆ
ԽԱՂԵՐԻՆ
04-02-2004 17:08:00 | Հայաստան | Սպորտ
ԵՐԵՎԱՆ, 4 ՓԵՏՐՎԱՐԻ, ՆՈՅՅԱՆ ՏԱՊԱՆ: Երեւանցի հրաձիգ Նորայր
Բախտամյանը, որը Հայաստանի մարզիկներից առաջինն է իրավունք նվաճել
մասնակցելու 2004 թվականի Աթենքի ամառային օլիմպիական խաղերին,
շարունակում է լրջորեն նախապատրաստվել այդ կարեւորագույն մարզական
ստուգատեսին:
Ինչպես «ՆՈՅՅԱՆ ՏԱՊԱՆ»-ի թղթակցին տեղեկացրին Հայաստանի
ազգային օլիմպիական կոմիտեի մամուլի ծառայությունից, վերջերս
Ն.Բախտամյանը երկրի հավաքականի ավագ մարզիչ Սեյրան Նիկողոսյանի հետ
մեկնել էր Լվով, որտեղ մասնակցեց Ուկրաինայի հավաքականի հրաձգային
կենտրոնում կազմակերպված համատեղ ուսումնամարզումային 15-օրյա
հավաքին: Այնուհետեւ հայ հրաձիգը հանդես է եկել Մյունխենում
անցկացված միջազգային մրցաշարերում: Առաջինում Ն.Բախտամյանը
օդամղիչ ատրճանակով վաստակել է հավաքել է 587 միավոր եւ գրավել
պատվավոր 3-րդ տեղը, իսկ երկրորդում 583 միավորով գրավել է 6-րդ
տեղը: Գերմանիայից Ն.Բախտամյանը վերադարձել է Ուկրաինա, որտեղ
մասնակցելու է այդ երկրի բաց առաջնությանը: