ՀԱՅԱՍՏԱՆԻ ՇԱԽՄԱՏԻՍՏՈՒՀԻՆԵՐԸ ՀԻԱՆԱԼԻ ԵՆ ՀԱՆԴԵՍ ԳԱԼԻՍ
ԵՎՐՈՊԱՅԻ ԹԻՄԱՅԻՆ ԱՌԱՋՆՈՒԹՅՈՒՆՈՒՄ
20-10-2003 16:54:00 | Հայաստան | Սպորտ
ԵՐԵՎԱՆ, 20 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Բուլղարիայի Պլովդիվ
քաղաքում ընթացող շախմատի Եվրոպայի թիմային առաջնությունը մոտենում
է ավարտին. մնացել է անցկացնել ընդամենը մեկ մրցափուլ:
Հիանալի են հանդես գալիս Հայաստանի շախմատիստուհիները, որոնք
վերջին 3 մրցափուլերում 4 միավոր վաստակեցին: Գրոսմայստերներ Էլինա
Դանիելյանն ու Լիլիթ Մկրտչյանը ոչ-ոքի` 1-1 հաշվով, ավարտեցին
մրցախաղերը Ռուսաստանի եւ Ուկրաինայի թիմերի հետ, ապա 2-0 հաշվով
հաղթեցին Անգլիայի թիմին:
8 մրցափուլից հետո Հայաստանի թիմը վաստակել է 12 միավոր եւ
նույնպիսի արդյունք ունեցող եւս 3 թիմերի` Ռուսաստանի, Հունգարիայի
եւ Լեհաստանի, շախմատիստուհիների հետ բաժանում է 1-4-րդ տեղերը:
Հոկտեմբերի 20-ին կայանալիք վերջին` 9-րդ, մրցափուլում Հայաստանի
շախմատիստուհիները կխաղան լեհուհիների հետ: