ՀՀ գլխաւոր դատախազ Աղուան Յովսէփեանը մարտի 29-ին ընդունել է ԵԱՀԿ/ԺՀՄԻԳ –ի դիտորդական առաքելութեան ղեկավար Ռադմիլայ Շէկերինսկայի գլխաւորած պատուիրակութեանը: Հանդիպմանը մասնակցել է ՀՀ գլխաւոր դատախազի տեղակալ Արամ Թամազեանը: Ըստ ՀՀ գլխաւոր դատախազութեան մամուլի ծառայութեան հաղորդագրութեան, Հայաստանի գլխաւոր դատախազը հաւաստել է դատախազութեան վճռականութիւնն ու պատրաստակամութիւնը հետամուտ լինել հնարաւոր ընտրախախտումների վերաբերեալ հաղորդումների պատշաճ գրանցմանն ու քննարկմանը, դրանց համարժէք քրէաիրաւական գնահատական տալուն: Ա.Յովսէփեանը հիւրերին տեղեկացրել է, որ իր հրամանով մարտի 23-ին ստեղծուել է աշխատանքային խումբ` ընտրախախտումների վերաբերեալ հաղորդումների ընդունման, գրանցման եւ քննարկման նկատմամբ դատախազական հսկողութիւն իրականացնելու համար: Խմբում ընդգրկուել է 10 դատախազ, որի գործունէութեան համակարգումը կ'իրականացնի ՀՀ գլխաւոր դատախազի տեղակալ Արամ Թամազեանը: «Աշխատանքային խումբը ոչ միայն հսկողութիւն է իրականացնելու գրաւոր ստացուած հաղորդումների պատշաճ գրանցման ու քննարկման նկատմամբ, այլ նաեւ իրականացնելու է լրատուամիջոցների մշտադիտարկում` քննարկման առարկայ դարձնելով յանցագործութեան յատկանիշներ պարունակող ընտրախախտումների վերաբերեալ մամուլի հրապարակումները»,- նշել է Ա.Յովսէփեանը` աւելացնելով. «Քաղաքացին պէտք է վստահ լինի, որ յանցագործութեան մասին իր ահազանգը, պատշաճ քննութեան առարկայ կը դառնա»: Տեղեկացնելով, որ ընտրական գործընթացների վերաբերեալ ՀՀ քրէական օրէնսգրքով նախատեսուած է 12 յանցակազմ` ՀՀ գլխաւոր դատախազը համոզմունք է յայտնել, որ ստեղծուած մեխանիզմը հնարաւորութիւն կը տայ, որպէսզի ընտրախախտումների վերաբերեալ բոլոր հաղորդումները դառնան պատշաճ քննարկման առարկայ: «Ստացուած հաղորդումների եւ քննարկման ընթացքի, արդիւնքների վերաբերեալ տեղեկատուութիւնը կը տեղադրուի դատախազութեան ինտերնետային էջում, ինչը հնարաւորութիւն կը տայ բոլոր շահագրգիռ անձանց հետեւել ստացուած բողոքների քննարկման ընթացքին եւ բարձրաձայնել, եթէ որեւէ հաղորդում չգրանցուի եւ չդառնայ իրաւապահ մարմինների քննարկման առարկա»,- ասել է ՀՀ գլխաւոր դատախազը: Դիտորդական առաքելութեան ղեկավար Ռ.Շէկերինսկայան իր հերթին կարեւորել է ընտրութիւնների ընթացքի վերաբերեալ բողոքների պատշաճ քննարկման ապահովումն` արձանագրելով, որ հէնց այդ ընթացակարգն է լաւագոյն վկայութիւնը, թէ որքանով են իշխանութիւնները հետամուտ եւ պատրաստակամ յարգելու ընտրական իրաւունքը եւ անցկացնելու ազատ եւ արդար ընտրութիւններ: Այս առումով տիկին Շէկերինսկայան բարձր է գնահատել դատախազութիւնում ներդրուած փորձը եւ յոյս յայտնեց, որ այն իրօք կ'ապահովի ընտրախախտումների վերաբերեալ հնարաւոր բողոքների պատշաճ արձագանքը: ՀՀ գլխաւոր դատախազը կարեւորել է ոչ միայն հնարաւոր ընտրախախտումներին համարժէք քրէաիրաւական գնահատական տալն, այլ նաեւ նախականխիչ քայլերի ձեռնարկումը եւ արձանագրել, որ այդ ուղղութեամբ եւս դատախազութիւնը ձեռնարկել է որոշ քայլեր: Մասնաւորապէս 2012 թուականի մարտի 23-ին կազմակերպուել է գիտագործնական համաժողով` իրազեկելով ընտրախախտումների համար նախատեսուած քրէական պատասխանատուութեան մասին, քաղաքացիական հասարակութեան առաւել լայն շրջանակների հետ քննարկելով օրէնսդրական մի շարք խնդիրներ: ՀՀ գլխաւոր դատախազը վստահեցրել է, որ այդ ուղղութեամբ քայլեր կ'իրականացուեն նաեւ ընտրական ողջ գործընթացի ժամանակ` հնարաւորինս ապահովուելով ստեղծուած աշխատանքի խմբի գործունէութեան հրապակայանութիւնը: Կողմերը պայմանաւորուել են շարունակել համագործակցութիւնը:

---