Մայիսի 12-ին Ազգային ժողովը 59 «կողմ», 12 «դէմ» եւ 1«ձեռնպահ» ձայներով առաջին ընթերցմամբ ընդունեց կառավարութեան հեղինակած «Հանրային ծառայութեան մասին» օրէնսդրական փաթեթը: Այն ԱԺ-ում անցել էր երեք ընթերցումների ընթացակարգով, սակայն վերջնական ընդունումն ապրիլի 15-ի արտահերթ նիստում տապալուել էր. քուէարկութեանը չէին մասնակցել օրէնսդրական նախաձեռնութեան հիմնական ընդդիմախօսները` ՀՅԴ խմբակցութեան անդամները: Օրինագծով սահմանւում էն ՀՀ-ում պետական, համայնքային ծառայութիւններն ու պետական պաշտօններն ընդգրկող հանրային ծառայութեան սկզբունքները, կազմակերպման կարգը, էթիկայի կանոնները: Կարգաւորւում էն բարձրաստիճան պաշտօնատար անձանց գոյքի, եկամուտների ու փոխկապակցուած անձանց յայտարարագրման հետ կապուած յարաբերութիւնները։ Մասնաւորապէս, սահմանւում էն նուէրներ ընդունելու արգելքը, Հանրային ծառայողի եւ Բարձրաստիճան պաշտօնատար անձի էթիկայի յանձնաժողովների կազմաւորման եւ գործունէութեան կարգերը: Նախօրէին, նախագծի քննարկման ժամանակ, առանձին դրոյթների վերաբերեալ պատգամաւորների բազմաթիւ հարցադրումներից եւ առարկութիւններից պարզ դարձաւ, որ կառավարութեան օրէնսդրական նախաձեռնութիւնը ոչ միանշանակ է ընդունուել: «Օրինաց Երկիր» խմբակցութեան ղեկավար Հեղինէ Բիշարեանը քուէարկութիւնից առաջ յայտնեց, որ իրենք դէմ չէն «Հանրային ծառայութիւնների մասին» օրինագծին, «այլ պարզապէս կան որոշակի դրոյթներ, որոնց հետ կան անհամաձայնութիւններ», ուստի կներկայացնէն իրենց առաջարկութիւնները: «Բարգաւաճ Հայաստան» խմբակցութեան անդամ Նաիրա Զոհրաբեանն էլ յայտարարեց, որ կառավարութեան ներկայացրած նախագիծն այս տեսքով իրենց համար «չի կարող վերջնական ընդունելի լինել»: «Նախագծում կան մեզ համար բազմաթիւ անընդունելի դրոյթներ, որոնք կիրարկման դէպքում խնդրահարոյց էն լինելու, ուստի «Բարգաւաճ Հայաստան»-ը, ինչպէս եւ կոլիցիոն մեր գործընկերները, առաջին ընթերցմանը կողմ կը քուէարկի պայմանով, որ մինչեւ երկրորդ ընթերցում կառավարութեան արձագանքը լինի մեր ներկայացուելիք առաջարկներին: Կը լինի կառավարութեան արձագանքը դրական` երկրորդ ընթերցման ռեժիմում մեր քուէարկութիւնը կը լինի դրական, չի լինի դրական` խմբակցութիւնը կը քեարկի դէմ»: Ինչպէս նկատեց ՀՅԴ խմբակցութեան ղեկավար Վահան Յովհաննիսեանը, Հ.Բիշարեանն ու Ն.Զոհրաբեանը «բերեցին հէնց այն փաստարկները, որոնց վրայ հիմնուելով ՀՅԴ խմբակցութիւնը դէմ է քուէարկելու»: Նա նաեւ յաւելեց, որ նախօրէին, իր ելոյթից յետոյ, հիմնական զեկուցողը` ՀՀ արդարադատութեան նախարար Հրայր Թովմասեանը, նախընտրեց եզրափակիչ ելոյթ չունենալ ու հնչած առաջարկութիւնների վերաբերեալ դիրքորոշում չյայտնել:

---