ԵՐԵՒԱՆ, 8 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Դեկտեմբերի 8-ին Ազգային ժողովն առաջին ընթերցմամբ ընդունեց «Հայաստանի Հանրապետութեան միջազգային պայմանագրերի մասին» օրէնքում փոփոխութիւններ կատարելու մասին կառավարութեան հեղինակած օրինագիծը: Ըստ այդմ, մասնաւորապէս, ՀՀ միջազգային պայմանագրի կողմ կարող էն լինել նաեւ խաղաղութեան, մարդու իրաւունքների պաշտպանութեան, հումանիտար կամ ֆինանսատնտեսական աջակցութեան ոլորտներին առնչուող հարցերով` միջազգային իրաւունքի սուբյեկտ չհանդիսացող կամ որպէս այդպիսին չճանաչուած կազմաւորումները: Կառավարութեան հիմնաւորմամբ, օրէնքի նախագիծը մշակուել է` նպատակ ունենալով օրէնսդրօրէն աւելի յստակ կարգաւորել արդէն իսկ գոյութիւն ունեցող յարաբերութիւնները: «Մինչ այդ օրէնքում ունէինք այդ հնարաւորութիւնը, մասնաւորապէս, Լինսի հիմնադրամի հետ ենք ստորագրել համապատասխան պայմանագիր: Այս փոփոխութիւնն ընդլայնում է այդ ցանկը եւ հնարաւորութիւն է տալիս աւելի յստակ հիմքով շարունակել գործընթացը` միջազգային իրաւունքի սուբյեկտ չհանդիսացող կամ այդպիսին չճանաչուած կազմաւորումների հետ պայմանագրեր ստորագրելիս»,-նախօրէին ԱԺ-ում յայտնել էր հիմնական զեկուցող, ՀՀ արտաքին գործերի նախարարի տեղակալ Շաւարշ Քոչարեանը: Չնայած փոխնախարարի պնդումներին, թէ օրէնքում առաջարկուող փոփոխութիւնն «աւելի լայն է եւ չի վերաբերում միայն ԼՂՀ-ին», նախագիծն երկար եւ բուռն քննարկումների տեղիք տուեց: Ինչպէս նկատեց անկախ պատգամաւոր Վիկտոր Դալլաքեանը, օրէնսդրական նախաձեռնութիւնը լաւ հնարաւորութիւն էր, որպէսզի խորհրդարանում քննարկուէն Լեռնային Ղարաբաղի հետ կապուած մօտեցումները: Շ.Քոչարեանը նկատեց, թէ օրէնսդրական նախաձեռնութիւնը ԼՂՀ-ի տեսանկիւնից դիտարկելու դէպքում, կարելի է արձանագրել, որ այն դեռեւս միջազգայնօրէն ճանաչուած չէ, սակայն այս փոփոխութեամբ ՀՀ-ի համար հանդիսանալու է միջազգային պայմանագրի կողմ: Նշուեց նաեւ, որ Հայաստանը ԼՂՀ-ի հետ ունի բազմաթիւ գործող պայմանագրեր, եւ այդ գործընթացը շարունակուելու է: «Տարբերութիւնը կարող է լինել այն, որ ԼՂՀ-ի հետ ստորագրուելիք պայմանագիրը կարող է բերուել ԱԺ վաւերացման, ինչը մինչ այդ տեղի չի ունեցել»,-ասաց փոխնախարարը: Նախագծի ընդդիմախօսները` «Ժառանգութիւն» խմբակցութեան անդամները, քուէարկութեանը չմասնակցեցին, ըստ խմբակցութեան ղեկավար Ստյոպայ Սաֆարեանի, «համարելով նախագիծը չմտածուած, չհիմնաւորուած»: Դեռեւս նախօրէին Ս.Սաֆարեանը յայտարարել էր, որ խօսքն ամենեւին չի վերաբերում Ղարաբաղի հետ պայմանագրային հիմքեր ունենալուն: «Մենք բոլորս դրա կողմնակից ենք, բայց միաժամանակ յստակ գիտակցում ենք, որ ամենալաւագոյն ճանապարհը ԼՂՀ-ն ճանաչելն է եւ ճանաչման հիմքի վրայ համագործակցութեան պայմանագրեր կնքելը»,-վստահեցրել էր նա:

---